Бэс ыйын 6 күнүгэр поэт, журналист, публицист Ньукулай Чуор төрөөбүтэ 90 сылын бэлиэтиир тэрээһин Сиэйэ нэһилиэгэр буолан ааста.
Чуору “тута хоһуйуу маастара” дииллэрэ. Онон бу тэрээһиммитигэр “Сунтаар миигин ыҥырар” литературнай пикниккэ мэлдьи ыытыллар “Кэмчи кэрчиктэр” диэн тута хоһуйуу күрэһин киллэрбэт буолуохпутун сатаммат этэ.
Ырыа-хоһоон көҥүл түһүлгэтин быыһыгар поэт оҕолоро сүбэлэһэн баран: “Өр толкуйдуу сатаабаппыт, тирэх буолар тылгыт “Чуор” диэн буолар”, – диэтилэр. Тэрээһиҥҥэ мустубут 2 улуус айар дьоҕурдаах дьоно бэриллибит кылгас кэмҥэ айар иэйиилэрин киллэринэн, өйгө кэлбит тыллары наардыы охсон 4 строкалаах кэмчи кэрчиги суруйан библиотека кыргыттарыгар туттардылар. Дьүүллүүр сүбэҕэ Сунтаар улууһун “Ньургуһун” түмсүүтүттэн – Дьячковская В.Г.-Хара Көмүс, Ньурба улууһун “Ньурба уоттара” түмсүүтүттэн Сельтюкова А.Р.-Айалла уонна поэт кыыһа Күннэйэ Николаевна киирэннэр кыайыылааҕы быһаардылар.
Ол курдук, “Кэмчи кэрчиктэр” күрэс кыайыылааҕынан “Ньургуһун” түмсүү чилиэнэ Макарова И.И.-Толоон Туорааҕа буолан 3000 солк. уу харчынан тутан үөрүүтэ үрдээтэ.
Кыайыылаах кэмчи кэрчигин билсиҥ:
Чуор түһүлгэтин төрүттээн,
Чуордук чоргуйа ыллыаҕыҥ,
Чуор убай сэргэҕин утумнаан
Чуо-бааччы чуопчаара туойуоҕуҥ!
Мария Иванова, Сунтаар киин бибилэтиэкэтин
библиография уонна кыраайы үөрэтии салаатын сэбиэдиссэйэ
