Нерюнгри куоракка ыытыллыбыт Олоҥхо ыһыаҕын биир улахан тэрээһининэн 100 киһи П.А. Ойуунускай “Дьулуруйар Ньургун Боотур” олоҥхотун икки күн устата ааҕыылара буолла. Бу бырайыагы 2022 сыллаахха Үөһээ Бүлүүгэ ыытыллыбыт Олоҥхо ыһыаҕар Наталья Петрова салайааччылаах киин бибилэтиэкэ олохтоон, быйыл 4-с төгүлүн ыытылынна, онуоха Сунтаар киин бибилэтиэкэтэ эмиэ 4-с төгүлүн ааҕыыга кытынна. Быйыл Елена Федорова, ааҕааччыны кытта үлэлиир салаа сэбиэдиссэйэ, Альмира Иванова, комплектование салаатын бибилэтиэкэр-каталогизатора уонна мин буолан аахтыбыт.
Быйылгы түһүлгэ уратытынан олоҥхону 7 тылынан: сахалыы, нууччалыы, эбэҥкилии, эбээннии, французтуу, английскайдыы, таджик- персидскэйдии — тылларынан ааҕыылара буолла. “Ньургун Боотур” эбэҥкилии уонна таджик-персидскайдыы тылбааһа суох. Ону Нерюнгри олохтоохторо тылбаастаабыттар.
Ол курдук, Нерюнгри оройуонун Бочуоттаах гражданина, эбэҥки учуобунньугун ааптара Клавдия Иннокентьевна Макарова эбэҥки тылыгар тылбаастаабыт. Оттон таджик омуктар общиналарыттан кэргэннии Садбарга уонна Абдусалом Пахлавоновтар – Авиценна уонна Омар Хайям айбыт-суруйбут тылларыгар тылбаастаатылар. Бэлиэтээн эттэххэ, Абдусалом Пахлавонов Таджикистан университетыгар таджик-персидскэй тыл учууталын үөрэҕэр үөрэммит эбит. Сэттэ сыыппара мээнэҕэ ылыллыбатах, ол курдук Нерюнгри улууһа 7 поселениелаах, 7 араас хостонор сир баайдаах эбит, онон олоҥхобут 7 тылынан иһиллибитэ ураты суолталаах буолла.
Бырайыак улахан суолталааҕын Ил Дархан Айсен Николаев, Олоҥхо ыһыаҕын тэрийэр хамыыһыйа бэрэссэдээтэлэ Сергей Местников, култуура миниистирэ Афанасий Ноев, Нерюнгри оройуонун баһылыга Роман Щегельняк көрөн-истэн барбыттара туоһулуур.
Нерюнгри Ытык Таастаах сиригэр улуу олоҥхобут араас тылынан иһилиннэ, 100 араас омук киһитэ олоҥхо эйгэтигэр киирэн, төрөөбүт тылбытынан ылыннарыылаахтык аахпыттарыттан киэн тутуннум. Ааҕааччылар араас эйгэттэн араас идэлээхтэр бааллар: учууталлар, дьаһалта үлэһиттэрэ, устудьуоннар, култуура эйгэтин үлэһиттэрэ уонна да атыттар. Ол курдук, Горнай улууһун аҕа баһылыга Никита Викторович Андреев, Ньурба улууһун култууратын салайааччыта, быйылгы ыһыах оһуокайын күрэһин кыайыылааҕа Розалия Михайловна Тихонова аахтылар. Ааҕыы таһыма, олоҥхо тэтимин тутуһуута, сэттэ араас тылынан ааҕыы истээччини тардар, умсугутар эбит.
Эһиил ыытыллар олоҥхо ыһыаҕын хаһаайыттара Кэбээйи улууһун бибилэтиэкэтин салайааччыта Анисия Дмитриевна Спиридонова ааҕыытынан уонна олоҥхо ааҕыытын марафонун эстафетатын нерюнгрилар Кэбээйи улууһугар туттарыыларынан түмүктэннэ.
Изабелла Жиркова, Сунтаар библиотекаларын ситимин салайааччыта
