«Сахам сирин таптыыбын»
Леонид Попов
Сахам сирин таптыыбын,
Сайылыгын ырыатын,
Сааскы күнэ тахсыытын,
Сарыал тыгар күөх тыатын, —
Сахам сирин таптыыбын.
Сахам сирин таптыыбын,
Саамал кымыс утаҕын,
Санньыар хомус тыаһыырын,
Саарба, саһыл бултааҕын, —
Сахам сирин таптыыбын.
Сахам сирин таптыыбын,
Санаа курдук дэлгэй
Сандал күннээх сыһыытын,
Сайдар, үүнэр үчүгэй
Сахам сирин таптыыбын!
Саха Өрөспүүбүлүкэтин өрөгөйүн ырыата
Савва Тарасов, Михаил Тимофеев
Сахам сирэ дьоллоох тускуга
Саһарҕалыы ыҥыра ыллыыр.
Илинтэн арҕаа ол кустуга
Алмаас таас курдук сандаара сырдыыр
Барҕа быйаҥнаах Сахам дойдута
Модун Арассыыйа киэн туттуута,
Өркөн өрөгөй тойугун туойдун,
Үүнэр үйэҕэ үрдүү туруохтун!
Үллэр үөстээх Өлүөнэ Эбэ
Өлбөт мэҥэ угуттуур уулаах.
Элбэх омукка эрчим эбэр,
Или-эйэни олохтуур уохтаах.
Ааспыт кэммит айхаллаах суола
Арчылыыр аар алгыһын биэрдэ.
Сахабыт сирэ дьоһун, дуолан
Сайдыы аартыгар түөрэҕэ түстэ.
“Төрөөбүт төрүт буорум – Саха сирэ!”
И.Артамонов
Эн күөрэгэй ырыалаах алаастаргын,
Эн бултаах-алтаах халыҥ тайҕаларгын,
Эн балыгыгнан күндүлүүр күндү күөллэргин,
Эн күрүлгэннээх сүүрүктээх үрэхтэргин,
Эн кырса мааны туундараҕын,
Эн былыттыын аалсар хаардаах хайаларгын –
Бука-барытын, бука-барытын,
Оо, таптыыбын, төрөөбүт төрүт буорум –
Сахам сирэ!
Кыһыны мутук тостор
Хабараан тымныыгын,
Сайынын сүрэҕи умата
Өрүҥүрүк куйааскын,
Ханна да,
Ханнык да бэйэлээх дойдуга
Ыраатан, тэлэһийэн сылдьаммын
Мэлдьитин долгуйа ахтабын,
Ахтабын, оо, төрөөбүт төрүт буорум –
Сахам сирэ!
Эн үүнэр аналлааххын,
Эн үрдүүр дьылҕалааххын,
Эн алмаас сарыаллааххын,
Эн күн төрүүр көмүс хайатын,
Эн Россия маанылаах кыыһаҕын!
Эйигинэн киэн туттаммын,
Сүрэҕим үөрүүтүн, уруйун-айхалын
Партия, бар дьоммор анааммын
Мин бүгүн ыллыахпын-туойуохпун баҕарабын,
Оо, төрөөбүт төрүт буорум – Сахам сирэ.
“Сахам сирэ барахсан”
Иван Гоголев
Үрүҥ эһэ арҕаһыныы
Үллэр бааллаах хоту байҕал
Кытылыгар айар, ыллыыр
Сахам сирэ барахсан.
Оо, төрөөбүт күндү дойдум!
Таптыыбын эн ырыаларгын,
Хара улар хааһын курдук
Аалай кыһыл сарыалгын.
Олоҥхо да кыраайыгар
Эн хомуһуҥ тыаһын суохтуом.
Ханнык да сир халлааныгар
Эн сулускун мин булуом.
Ыалдьар күммэр мин аттыбар
Эн хатыҥын санаарҕаатын,
Үөрэр күммэр мин тулабар
Эн чыычааҕын ыллаатын.
Киирбэт күҥҥүн сүрэх курдук
Түөспэр өрүү илдьэ сылдьыам,
Көҥүл, модун Ийэ дойдум
Киэн дуолун сырдатыһыам.
«Төрөөбүт дойду туһунан ырыа»
Алексей Тимофеев
Таптыыбын көҕөрөр халлааннаах
Төрөөбүт Ийэ сир дойдубун;
Үөрэнэр, сынньанар бырааптаах
Үлэлээн дьоллонор норуоппун;
Бу маннык үөл сирэм үллүктээх
Мин үтүө дойдуну билбэппин;
Күөгэйэр, сайаҕас салгыннаах
Күн сирин күндүтүн көрбөппүн.
Күндээрэн күлүмнүүр уутугар
Күрүлэс купааска суунабын;
Күөх быраан чэлгийэр тыатыгар
Күүлэйдээн көҥүллүк тыынабын;
Сытыы мүөт сымнаҕас кырсыгар
Сыламнаан, сыппьанан сытабын;
Тунал күн тунуйбут ньууругар
Чуораанныы чугдааран туойабын.
Барҕа баай быйаҥнаах сиригэр
Коммунист партия салайар;
Киэҥ, кэтит киэргэллээх иэнигэр
Килбиэннээх очуоһу дабайар;
Дьоллонор дойдубут буоругар
Геройдар талыллан төрүүллэр;
Тускулу тутуһар туһугар
Долгуйар сирбитин симииллэр.
«Сахам сирин таптыыбын»
И.Павлов
Таптыыбын кылгас сайыннаах
Тыйыс төрөөбүт дойдубун,
Кымыс – үүт, сүөгэй быйаҥнаах
Күөх сирэм саамал уйгутун.
Сипсийэр суугун аргыстаах
Тулалыыр бу кэрэ тыабын,
Сүрэҕи сүүйэр алыптаах
Сахам сирин таптыыбын.
Туналыйар налыы алаас
Торҕо солконон тупсаран,
Тыымпы күөлүгэр таллалаан
Тыал күөһэлийэ устара.
Сахам сирэ
Наталья Харлампьева
Сахам сирэ, сырдык дойдум,
Халыҥ хаардаах сыһыыларыгар
Оҕо сааһым чаҕаан кэмин
Саһыарарга дылыгын.
Сахам сирэ, тыйыс дойдум,
Тыыны хаайар тымныыларгар
Олох барахсан тургутуута
Кистэнэрин билэбин.
Сахам сирин, нарын дойдум,
Чараас сырдык чараҥнаргар
Тапталым истиҥ иэйиитин
Сандаарыта сырдатаар.
Сахам сирэ, модун дойдум,
Өлүөнэ сааскы көмүөлүгэр
Киһи буолар дьоһун дьылҕам
Көҥүл күүһүн көрдөрөөр!
«Сахам сирэ»
Наталья Михалева – Сайа
Сахам сирэ мин ырыабар
Мин иһирэх эппит тылбар
Эн тойугун дуораан кута
Иһиллибит буоллаҕына
Айар саргы кынатынан
Айыы сирин алгыы кууһуом
Сахам килбик майгытынан
Аргыый кистээн дьоллоох буолуом
Сахам сирэ, сахам сирэ
Сардаҥалаах ааккар кытта
Хаардаах дойдум сылаас тыына
Улуу таптал уоспат күүһэ
Сахам сирэ
Мин халлааным
Хараҥарар түгэнигэр
Үҥэр күнүм
Үрүҥ күнүм
Эн буоларгын
Эрэ өйдүөм
Эйиигиттэн ордук курдук
Эгэлгэлээх кытыллартан
Эн тымныыгар хаарыллаары
Эмиэ тиийэн кэлэ туруом
Сахам сирэ мин кутум-сүрүм
Сахам сирэ мин үрдүк иэйиим
Сахам сирэ мин ыллыыр ырыам
Тапталлаах мин Сахам сирэ!
Сахам сирэ
Наталья Харлампьева
Сахам сирэ, сырдык дойдум,
Халыҥ хаардаах сыһыыларыгар
Оҕо сааһым чаҕаан кэмин
Саһыарарга дылыгын.
Сахам сирэ, тыйыс дойдум,
Тыыны хаайар тымныыларгар
Олох барахсан тургутуута
Кистэнэрин билэбин.
Сахам сирин, нарын дойдум,
Чараас сырдык чараҥнаргар
Тапталым истиҥ иэйиитин
Сандаарыта сырдатаар.
Сахам сирэ, модун дойдум,
Өлүөнэ сааскы көмүөлүгэр
Киһи буолар дьоһун дьылҕам
Көҥүл күүһүн көрдөрөөр!