Учуутал — киэҥ билиини, үрдүк идэ таһымын эрэ буолбакка , дириҥ бэриниилээх, оҕоҕо сайаҕас сыһыаннаах, бастыҥ хаачыстыбалары уһугуннаран, киһи киһитин сатаан иитэн таһаарыы, үөһэттэн айдарыы буолар. Сунтаар улууһун педагогическай устуоруйата баай-талым. Саҥа кинигэ дьоруойдара улууспут билиҥҥитин эрэ буолбакка, сарсыҥҥытын саргылыыр, аартыгын арыйар тумус туттар дьоммут буолаллар. “Миссия талантливых сердец”- Сунтаар улууһугар үөрэҕирии салаата төрүттэммитэ 95 сылыгар, методическай сулууспа тэриллибитэ 85 сылыгар аналлаах саҥа кинигэ сүрэхтэннэ.
Кинигэҕэ олохторун учуутал идэтигэр анаабыт, баай опыттаах киэҥ билиилэрин элбэх көлүөнэ үөрэнээччилэригэр иҥэрбит ветеран
учууталлар, ону тэҥэ билигин ситиһиилээхтик үлэлии сылдьар эдэр көлүөнэ учууталлар үлэлэрэ сырдатыллар. Хомуурунньугу Сунтаар улууһун үөрэҕириитин салалтатын информационно-методическай салаа сэбиэдиссэйэ Семенова Туяра Борисовна, Сунтаар улууһун үөрэҕириитин салалтатын информационно-методическай салаатын кылаабынай исписэлииһэ Попова Маргарита Иннокентьевна хомуйан оҥордулар.
Леонтьева Пальмира Егоровна, Георгий Бессонов аатынан Тойбохой орто оскуолатын научно-методическай үлэҕэ директоры солбуйааччы, РФ орто үөрэхтээһинин Бочуоттаах үлэһитэ, СӨ үөрэҕин систиэмэтин Үтүөлээх үлэһитэ, СӨ үөрэҕириитин туйгуна саҥа кинигэни бэрт сэргэхтик ырыппыта дьон болҕомтотун ылла. Ол курдук, бу кинигэҕэ Сунтаар оройуонун 31 оскуолатыттан барыта 226 наставник киирбит. Олортон 9 дириэктэр, 25 дириэктэри солбуйааччы, 62 алын сүһүөх кылаас, 19 нуучча тылын уонна литературатын, 17 саха тылын, 13 математика, 13 естественнай предмет, 12 эбии үөрэхтээһин, 10 омук тылын, 9 физкультура, 8 труд, 7 физика учууталлара, 6 педагог-библиотекарь, 3 соц.педагог, ОБЖ, история учууталлара, биир методист, информатик педагог – психолог үлэлэрэ сырдатыллар. Үтүө күн түһүлгэтигэр Сунтаар улууһун аҕа баһылыгын экономикаҕа солбуйааччы Борис Серафимович Васильев, Сунтаар улууһун үөрэҕириитин салалтатын салайааччы Борис Николаевич Васильев, Сунтаарбыт улууһун үөрэҕириитигэр бэриниилээхтик үлэлии сылдьар ытыктабыллаах дириэктэрдэр уонна учууталлар истиҥ эҕэрдэлэрин эттилэр. Дьокуускай куораттан Егорова Наталья Егоровна, педагогическай билим кандидата, РФ орто үөрэхтээһинин Бочуоттаах үлэһитэ, СР үөрэҕириитин туйгуна видеоэҕэрдэтин тириэртэ.
Сунтаар коррекционнай оскуола музыкаҕа учуутала Амонов Роман Радионович, Сунтаар алын сүһүөх оскуолатын эрдэ учууталларын «Ситим» ырыа ансаамбыла эҕэрдэ ырыаларынан киэргэттилэр. В. Павлов аатынан Сунтаардааҕы алын сүһүөх кэлэктиибэ ыалдьыттары сахалыы минньигэс астаах сандалынан күндүлээн астыннардылар. Үөрэҕи саҥа бүтэрэн кэлбит эдэр учууталга баай уопуттаах учуутал сүбэлээччи-амалааччы аҕа табаарыс, үтүө сүбэһит буоларын саҥа кинигэ тула кэпсэтии өссө төгүл бигэргэттэ.
Л.А. Попов аатынан Сунтаардааҕы киин бибилэтиэкэ ааҕааччыны кытта үлэлиир салаата.
