Аатырбыт-сураҕырбыт Сунтаар ыһыаҕын кэнниттэн бэс ыйын 25 күнүгэр Кыыл Уола үөскээбит дойдутугар Түбэй Дьаархаҥҥа оһуокай ыһыаҕын кэмигэр Сунтаар бибилэтиэкэлэрин кииннэммит ситимэ үгэс буолбут “Сунтаар миигин ыҥырар” ырыа-хоһоон түһүлгэтин үрдүк таһымнаахтык ыытта. Үгэс буолбут түһүмэхтэргэ айар куттаах дьон кыттан тыыннарын таһаардылар, айымньыларын киэҥ эйгэҕэ билиһиннэрдилэр.
Оһуокайга тута хоһуйуу туттуллар буолан баран, күнү-түүнү да быһа хоһуйа сылдьыахтарын сөп эбит буоллаҕына, “Кэмчи кэрчиктэр” ирдэбилэ биир буоларын быһыытынан, кыттааччылар 15 мүнүүтэ иһигэр биир бэриллибит тылга олоҕуран, 4 строкалаах айымньылары айа оҕустулар.
Тэрээһиҥҥэ мустубут улуус айар дьоҕурдаах дьоно бэриллибит кылгас кэмҥэ нарын иэйиилэрин киллэринэн, өйдөрүгэр көтөн түспүт тыллары сааһылыы охсон 4 строкалаах “кэмчи кэрчиги” суруйан библиотека кыргыттарыгар туттардылар. Дьүүллүүр сүбэҕэ биир дойдулаахтарбыт, суруйааччылар киирэннэр кыайыылааҕы быһаардылар: “Саха сирэ” хаһыат суруналыыһа, Арассыыйа уонна СӨ суруналыыстарын сойуустарын чилиэнэ Дьокуускайтан Надежда Егорова-Намылы уонна публицист, тылбаасчыт, дойдулар икки ардыларынааҕы уонна СӨ суруйааччыларын сойуустарын чилиэнэ Кутанаттан Валентина Дьячковская-Хара Көмүс уонна Дьүүллүүр сүбэ бэрэссэдээтэлэ СӨ суруйааччыларын сойууһун чилиэнэ, Арассыыйа суруналыыстарын сойууһун чилиэнэ Томпоттон Ирина Харайданова – Сэгэлдьийэ Чээлэй.
Кыттааччыларга биир тыл бэриллэр, ол тылы, дьэ, айар куттаахтар, суруйар дьоҕурдаахтар кэрэ тыллары кэккэлэтэн, 4 эрэ строкаҕа батаран, санааларын этиэхтээхтэр. Бу сырыыга түһүлгэбит ытык ыалдьыта Сэргэй Сибиэрэп – Кыыл Уолун төрөппүт уола Төгүл Сергеевич тута “оһуор үҥкүүтэ” диэн этэн, 15 мүнүүтэҕэ хоһуйуу тута саҕаланна, “аттар түстүлэр!” диэн буолла.
Барыта 15 кыттааччы үлэтин биэрдэ. Бииртэн биир үчүгэй строкалар айыллан, Дьүүллүүр Сүбэҕэ түмүк таһаарарга чэпчэкитэ суох үлэ буолла. Ол курдук, кэтэһиилээх, долгутуулаах түгэн тосхойон, дьүүллүүр сүбэ “Кэмчи кэрчиктэр” күрэс кыайыылааҕынан Элгээйиттэн биир идэлээхпит Татьяна Семенованы ааттаан, 5 тыһыынча суумалаах туоһу суругунан наҕараадалаан, сүргэтин көтөхтө, үөрүүтүн үксэттэ.
Бу күрэскэ саамай үөрэрбит – ырыа-хоһоон түһүлгэтэ хара саҕаланыаҕыттан түгэҕэ көстүөр диэри сэргээн-сэҥээрэн истэн олорбут ыччат оҕолорбут, Түбэй-Дьаархан оскуолатын үөрэнээччилэрэ кыттыыны ылбыттара буолар. Кинилэр ыытыллыбыт күрэстэргэ ааттаах-суоллаах айар куттаахтары кытта тэҥҥэ бэйэлэрин холонон көрдүлэр. Кинилэргэ тэрийээччилэр ааттарыттан Надежда Егорова – Намылы “Дьол хараҕа суох” кинигэтин туттаран, кыргыттар ааптартан автографтаах кинигэни бэлэх тутан астыннылар.
Суруйуубутун кыайыылаах үрдүк аатын сүкпүт Татьяна Семенова “оһуор үҥүүтүн” тула оһуордаан таһаарбыт 4 строкатынан түмүктүүбүт:
Оһуор үҥкүүтэ –
Айар кут чыпчаала,
Айар илбис иэйиитэ,
Саха омук киэргэлэ!
Мария Иванова, Марианна Поскачина,
Сунтаар киин бибилэтиэкэтин
библиография уонна кыраайы үөрэтии
салаата
