Сунтаар улууһугар 2023 сыл төрөөбүт төрүт тыл сылынан биллэриллибитэ. Сыл устата Л. А. Попов аатынан Сунтаардааҕы киин бибилэтиэкэ ааҕааччыны кытта үлэлиир салаатын үлэһиттэрэ «Ааҕар Сунтаар» бырайыагынан үлэлээтибит. Бырайыак чэрчитинэн сэтинньи ыйга – Байанай ыйыгар суруйар дьоҕурдаах, айар талааннаах дьону өйүүр санааттан «Кутаа кэпсээннэрэ» аахсыйаны ыыппыппыт. Бастакытын ыытыллар аахсыйаҕа, киһи үөрүөх, элбэх үлэ киирдэ. Ол курдук, Сунтаар улууһуттан, ону сэргэ Дьокуускай куораттан кытыннылар.
Чуолаан эр дьоҥҥо аналлаах булт абылаҥнаах араас түгэннэрин, мүччүргэннээх сырыыларын, дьиҥ олоххо буолан ааспыт түбэлтэлэр кэпсэнэллэрэ киһи болҕомтотун тардар. Бу хомуурунньук аахсыйа кыттыылаахтарын айымньыларын наардаан, сааһылаан ааҕааччы киэҥ араҥатыгар тарҕатар сыаллаах таҥылынна. Дьон-сэргэ сэҥээриитин ылыа диэн эрэнэбит. Инникитин даҕаны маннык үлэлэри ыытыахпыт, ааҕааччыларбытын үөрдүөхпүт диэн баҕа санаабыт улахан.
Л. А. Попов аатынан Сунтаардааҕы киин бибилэтиэкэ
ааҕааччыны кытта үлэлиир салаата