2024 сыл Арассыыйаҕа дьиэ кэргэн, Өрөспүүбүлүкэбитигэр оҕо саас, Сунтаар улууһугар аҕам саастаахтар сылларыгар сөп түбэһиннэрэн, маны сэргэ кэлэр кэнчээри ыччаты патриотическай тыыҥҥа иитиигэ аналлаах СӨ тыатын хаһаайыстыбатын үтүөлээх үлэһитэ, Сунтаар улууһун, Арыылаах нэһилиэгин бочуоттаах олохтооҕо, үлэ, муниципальнай сулууспа бэтэрээнэ Николай Алексеевич Егоров олоҕун, үлэтин сырдатар “Киһи бэрдэ, салайааччы үтүөтэ — Николай Алексеевич” диэн саҥа кинигэ Сунтаар нэһилиэгэр сүрэхтэннэ.
Кини, Сунтаар улууһун Уһун-Күөл бөһүөлэгин биир чаҕылхай уола, Арассыыйа уонна Донецкай норуодунай өрөспүүбүлүкэ дьоруойдара үрдүк ааттарын, хорсуннук сэриилэһэ сылдьан, геройдуу өлбүтүн кэннэ иҥэриллибит, Тихоокеанскай флот 155-с морской пехотатын байыаһа, рядовой Егоров Дмитрий Николаевич айбыт аҕата буолар.
“Киһи бэрдэ, салайааччы үтүөтэ – Николай Алексеевич” кинигэ, этиллибитин курдук, Николай Алексеевич Егоров олорбут олоҕун, үлэлээбит үлэтин кэпсииргэ анаммыт уонна удьуор утума быстыбатын, оҕону дьиэ кэргэҥҥэ иитии тус бэйэттэн саҕаланарын кэпсиир.
Кинигэ ааптара Уһун Күөл бөһүөлэгин олохтооҕо, кэлиҥҥи сылларга суруйар идэҕэ ылсыбыт, туспа истииллээх, ураты тыллаах-өстөөх Еремеев Эдуард Данилович буолар. Бэчээттэммит сирэ Сунтаар типографията. Ахсаана кэмчи, 50 экземпляр. Маассабай-бэлитиичэскэй таһаарыыга киирсэр, ааҕааччы киэҥ араҥатыгар ананар. Кинигэ бэчээттэнэн тахсыытын “Сунтаар улууһа (оройуона)” муниципальнай оройуон дьаһалтата (баһылык Анатолий Васильевич Григорьев) үбүлээтэ.
Николай Алексеевич төрөппүт уолун Ийэ дойдуга бэриниилээх, хорсун-хоодуот санаалаах гына иитэн, Дмитрий анал байыаннай дьайыыга тылланан баран, дьоруойдуу быһыыны көрдөрбүтүнэн Сахабыт сирэ, Сунтаарбыт улууһа киэн туттар. Кини туһунан өрөспүүбүлүкэбит хаһыаттарыгар үгүс ыстатыйалар тахсыбыттара. Бу матырыйаалларынан библиографическай ыйынньык оҥоһуллан кинигэ ис хоһоонун байытта.
Дьоро күн түһүлгэтигэр бэйэлэрин истиҥ эҕэрдэлэрин тириэртилэр: улууспут аҕа баһылыга Анатолий Григорьев, Сунтаар улууһун тутаах тэрилтэлэрин салайааччылара уонна биирдиилээн Сунтаар олохтоохторо.
Бу саҥа кинигэҕэ улахан отделение, бөһүөлэгин туһугар туруулаһан туран, уруккута хомуньуус баартыйа эрэллээх саллаата киһи, түһүүлээх-тахсыылаах үлэтин туһунан кэпсээнэ ааҕааччы болҕомтотун тардыа диэн эрэнэбит.
Сана кинигэ тахсарыгар Л. А. Попов аатынан Сунтаардааҕы киин бибилэтиэкэ кылаата улахан. Ол курдук, редакциялаата Иванова М. Х., компьютернай версткатын оҥордо Иванов С. П., библиографическай ыйынньыгы оҥордо Чирикова Л. В. Саҥа кинигэ ааҕааччы сэҥээриитин ылыа диэн эрэнэбит.
Суруйда ааҕааччыны кытта үлэлиир салаа кылаабынай бибилэтиэкэрэ Мария Алексеева
