Кинигэ-билии төрдө, кинигэ -үтүө доҕор, сүбэһит диэн дириҥ суолталаах этиилэри истэн, билэн, ыччаттарга иҥэрэр сыаллаах киһи -аймах бүгүҥҥэ дылы сайдан-үүнэн кэллэҕэ. Быйыл алтыс төгүлүн ыытыллар «Сила книги» диэн улахан акция өрөспүүбүлүкэҕэ Оҕо сылыгар ананна. Ол курдук өрөспүүбүлүкэ бары бибилэтиэкэлэригэр оҕолор сөбүлүүр айымньыларын акция кыттыылаахтарыгар доргуччу, тиийимтиэлээхтик аахтылар уонна ааҕыллыбыт айымньы тула санааларын үллэһиннилэр. Ааҕыыны көҕүлүүр, оҕону кыра сааһыттан ааҕыы туһатын иҥэрэр сыаллаах улахан тэрээһиҥҥэ Уйбаан Нуолур аатынан Элгээйи модельнай бибилэтиэкэтэ эмиэ кыттыста. П.Х.Староватов аатынан Элгээйи орто оскуолатын маҥнайгы уонна иккис кылааһын бастыҥ кинигэ ааҕааччылара Сафонов Эрсан,Максимов Арылхан, Чярин Эрсан,Николаева Ванесса,Петров Юра,Яковлева Аня,Коркина Алиса Агния Барто хоһооннорун,Амма Аччыгыйа «Тоҕус төгүл тоҕо» айымньытыттан уонна нуучча остуоруйатын бииргэ үөрэнэр оҕолоругар, төрөппүттэргэ, учууталларга ааҕан иһитиннэрдилэр. Бу күн ааҕыллыбыт айымньылар туохха үөрэтэллэрин, тугу ордук сөбүлээбиттэрин туһунан ырытыыга оҕолор бары сүрдээх көхтөөхтүк кыттыстылар, санааларын үллэһиннилэр. Ааҕыы күүһэ биллэн турар кинини сөптөөхтүк туһанаргар, айымньы ис хоһоонун сөптөөхтүк өйдүүргэр сытар. Ыччат оҕолорбут кыра саастарыттан сөбүлүүр геройдаах, сөбүлээн ааҕар суруйааччылаах, сөбүлүүр айымньылаах буоллуннар диэн Ааҕар алаһа дьиэ эһигини өрүү күүтэр!
