Олунньу 14 күнэ – Аан дойдутааҕы кинигэ бэлэхтиир күн. Ол чэрчитинэн Леонид Попов аатынан улуус киин бибилэтиэкэтэ сылын ахсын “Кинигэтэ бэлэхтээ” аахсыйа тэрийэрэ үтүө үгэскэ кубулуйда.
Быйылгы аахсыйаҕа 4 ааҕааччыбыт бибилэтиэкэ фондатын дьоһуннаах кинигэлэринэн байыттылар: Васильев Яков Афанасьевич, Зинаида Михайловна Афанасьева, Дария Михайловна Григорьева, Лукин Валерий Викторович уонна эдэр киһи Альберт Намылов. Бэлэхтэммит кинигэлэр үксүлэрэ кыраайы үөрэтиигэ туһуламмыттар, ону таһынан сахалыы уус-уран айымньылары сэргэ нуучча, омук классиктарын айымньылара буолаллар. А.Н. Афанасьев-Сэһэн Өлөксөй огдообото Зинаида Михайловна биһиги фондабытыгар суох уонна ахсаана аҕыйах кэргэнин кинигэлэрин; аахсыйабытыгар сыл аайы көтүппэккэ көхтөөх кыттыыны ылар “Россия ийэлэрэ” түмсүү Сунтаардааҕы филиалын салайааччыта Дария Григорьева төрөөбүт Сунтаарбыт улууһун, дьонун-сэргэтин туһунан кинигэлэри аҕалбыттара үс бүк үөрүүлээх.
Хамсааһыны өйөөн, аахсыйаҕа кыттыспыт дьоммутугар улахан махтал буоллун, эһиэхэ чэгиэн доруобуйаны, бөҕө туругу баҕарабыт!
Л. Попов аатынан Сунтаар киин бибилэтиэкэтин
ааҕааччыны кытта үлэлиир салаата
