Бүгүн, балаҕан ыйын 22 күнүгэр Л.А.Попов аатынан Сунтаардааҕы киин бибилэтиэкэҕэ Дьокуускай куораттан Саха сирин норуоттарын музыкатын уонна фольклорун түмэлин үөрэхтээһин отделын сэбиэдиссэйэ Ольга Николаевна Громова салайааччылаах бөлөх Санкт-Петербурдааҕы «Муора» киностудия режиссера Мила Кудряшевалыын устубут «Женский голос Арктики» диэн документальнай киинэлэрэ көрдөрүлүннэ. Киинэ эдэр ыччат айылҕаттан бэриллибит дьоҕурун тобулан, кэҥэтэн, сайыннаран, төрөөбүт дойдутугар үүнэр-сайдар кыахтаах диэн ис хоһоонноох. 2021 сыллаахха биллэриллибит куонкуруска барыта 500 талааннаах эдэр ыччат кыттыбыт. Финалга тахсыбыт 3 кыыс бу киинэҕэ уһуллубуттар. Ол курдук, Варвара Степанова-Арчыына, Туяра Жиркова, Нарияна Ренанто күннээҕи олохторун, айылҕаттан бэриллибит талааннарын режиссер ураты хараҕынан арыйда.
Бу документальнай киинэ 2023 сыл кулун тутар ыйыгар Дьокуускайга «Лена» кинотеатрга сүрэхтэммитэ. Бастакы хайысханан Бүлүү бөлөх улуустарыгар: Горнайга, Бүлүүгэ, Үөһээ Бүлүүгэ, Ньурбаҕа уонна Сунтаарга көрдөрүлүннэ.
Иккис хайысханан: Хаҥалас уонна Нам улуустарыгар көрдөрүллүөхтээх уонна түмүктүүр хайысханан — Дьокуускай куорат устудьуоннарыгар көрдөрүллэрэ былааннанар.
Маны таһынан, бу киинэ режиссера Мария Кудряшева билигин Арассыыйа араас кинофестивалларыгар кыттыыны ыла сылдьар. Биир дойдулаахтарбытыгар ситиһиини баҕара хаалабыт.
Суруйда Л.А.Попов аатынан Сунтаардааҕы киин бибилэтиэкэ ааҕар саалатын сэбиэдиссэйин эбээһинэһин толорооччу Мария Алексеева.
