Сэтинньи 21 күнүгэр, Л.А.Попов аатынан киин бибилэтиэкэҕэ доруобуйа харыстабылын бэтэрээнэ, «Аляска-Сибирь салгыннааҕы байыаннай трасса 80 сыла» юбилейнай мэтээл, Байыаннай лүөччүк В.Захарова төрөөбүтэ 100 сыла, Гражданскай авиация 95 уонна 100 сылларыгар анаммыт Арассыыйа юбилейнай бэлиэлэрин хаһаайына Мария Семеновна Федорова – Куйаара “Халлаан хоһуун хотойдоро” диэн кинигэтэ сүрэхтэниитин үөрүүлээх түгэнэ буолла.
“Халлаан хоһуун хотойдоро” кинигэ үс чаастаах, Саха сирин араас көлүөнэ лүөччүктэрэ оҕо саастарын баҕа санааларын толорон Аҕа дойдуларын көмүскүүргэ кыайыылаах кыттыыларын уонна кини сайдыытыгар күүрээннээх үлэлэрин кэпсиир. Дойду авиациятын сайдыытын историятыгар лүөччүктэр тус бэйэлэрэ киллэрбит кылааттарын, идэни талыы олох олуга буоларын көрдөрөр.
Кинигэ бастакы чааһа 2019 сыллаахха “Офсет” типографияҕа сахалыы уонна нууччалыы тылынан, 100 ахсаанынан бэчээттэнэн тахсыбыт. Күөх халлааны баһылаабыт, саха биир ньургун уолугар, лүөччүк Аркадий Николаевич Михайловка анаммыт.
Иккис чааһа 2021 сыллаахха “Офсет” типографияҕа, 50 ахсаанынан бэчээттэнэн тахсыбыт. Саха сиригэр Гражданскай авиация, күргүөмнээхтик, түргэнник уонна күүскэ сайдарыгар бары күүһүн-уоҕун, билиитин-көрүүтүн, элбэх сыратын уурбут, билигин даҕаны авиация эйгэтигэр үлэлии сылдьар саха омук чулуу уолугар, айылҕаттан айдарыылаах лүөччүк Степан Петрович Калачевка анаммыт.
Үһүс чааһа 2024 сыллаахха “Офсет” типографияҕа, 100 ахсаанынан бэчээттэнэн тахсыбыт. Саха авиациятын олохтонуутугар дойдубут киэҥ халлаанынан араас сылларга салгын көтөр аалларыгар үлэлээбит, билигин үлэлии сылдьар Сахабыт сирин чулуу дьонугар-лүөччүктэргэ анаммыт.
Бу дьоро, бэлиэ күҥҥэ аймахтара, бииргэ алтыспыт дьонноро кэлэн истиҥ-иһирэх ахтыылары оҥордулар. Маны таһынан Сунтаар улууһун култууратын уонна айылгытын салалтатын аатыттан эҕэрдэтин уонна сэмэй бэлэҕин туттарда координационнай салаа исписэлииһэ Урсууна Александровна Федорова. Сунтаар нэһилиэгин олохтоох дьаһалтатын аатыттан эҕэрдэ суругу туттарда уонна “Главное ребята сердцем не стареть” диэн ырыанан Роман Радионович Амонов эҕэрдэлээтэ. Салҕыы Сунтаардааҕы авиапорт салайааччыта Артем Павлович Семенов, Сунтаар улууһун Л.А.Попов аатынан киин бибилэтиэкэ салайааччыта Изабелла Ивановна Жиркова, СӨ култууратын туйгуна, Саха сирин суруйааччыларын сойууһун чилиэнэ Ксения Дмитриевна Соколова эҕэрдэлэрин, санааларын эттилэр.
Бу курдук үлэни өрө туппут Мария Семеновна Саха сирин араас көлүөнэ лүөччүктэрэ “Халлаан хоһуун хотойдоро” кинигэ сүрэхтэниитэ олус истиҥ эйгэҕэ, үтүө дьон ортотугар, үөрүү-көтүү аргыстаах ыытылынна. Мустубут дьон астынан, сэргэхсийэн тарҕастылар.
Суруйда Л.А.Попов аатынан киин бибилэтиэкэ ааҕааччыны кытта үлэлиир салаа
сүрүннүүр бибилэтиэкэрэ Саргылана Генерова
