Муус устар саха халандаарынан Айыыһыт ыйа. Бу кэмҥэ киһи кэрэни өйдөөн көрөрө күүһүрэр. Кэрэни хоһуйан ыллаан-туойан, үҥкүүлээн оонньоон кэлиэх-барыах санаата кэлэр кэмэ. Ол курдук муус устар 25 күнүгэр — 2024 сыл Сунтаар улууһугар Аҕам саастаахтар сылларын чэрчитинэн библиотечнай үлэ бэтэрээнэ, Саха Өрөспүүбүлүкэтин култууратын туйгуна, Сунтаар нэһилиэгин бочуоттаах олохтооҕо, Дина Васильевна Николаева- Алаас Кыыһа “Ырыаларым-ымыыларым” диэн Сунтаар ааптардарын хоһоонноругар айыллыбыт ырыаларын матыыптарын хомуурунньуга бэрт сэргэхтик сүрэхтэннэ.
Тэрээһин саҕаланыыта күөх экраҥҥа Дина Васильевна олоҕун кэрчик кэмнэрин хаартыскалара, урукку-хойукку кэми санаттылар. «Ырыаларым-ымыыларым» кинигэҕэ Алаас Кыыһа саха суруйааччыларын, Сунтаар ааптардарын хоһоонноругар айыллыбыт матыыптара нотаҕа түһэриллэн киирдилэр. Кинигэ иһинээҕи ойууларын худуоһунньук Роберт Софронов үлэлэрэ киэргэтэн, ситэрэн-хоторон биэрэллэр. Үтүө күн түһүлгэтигэр ыҥырыылаах ыалдьыттарга Дина Васильевна Күөх хонуу суугуна диэн бастакы ырыатын ыллаан бэлэх ууннулар ырыа аргыстаах «Көлүкэчээн» ансаамбыл салайааччы Галина Евсеева. Истиҥ эҕэрдэлэрин анаатылар Сунтаар улууһун култууратын уонна айылгытын салалтатын салайааччыта Саргылана Омукова, өр сылларга бэриниилээхтик үлэлээбит кэлэктиибин салайааччыта Изабелла Жиркова, Сунтаар улууһун “Ньургуһун” литературнай түмсүүтэ, Дьокуускай куораттан кыыһа Алена оҕолорунаан, аймахтара, Владимир Николаев аатынан народнай театр режиссера Татьяна Заровняева, оҕо сааһыттан арахсыспат дьүөгэтэ Светлана Яковлева уонна 41 сыл усталаах туоратыгар “Эн, мин” дэһэн бииргэ үлэлээбит кэллиэгэлэрэ, библиотечнай ситим бэтэрээннэрэ, оҕо бибилэтиэкэтин үлэһиттэрэ, Кириэстээхтэн “Тымтык” литературнай түмсүү уонна “Далбар Хотуттар” тойуксуттар бөлөхтөрө эҕэрдэлээтилэр.
Бу киэһэ саҥа хомуурунньуктан “Хомус”, “Алгыс”, “Үҥкүүлүүр үрүҥ түүн”, “Кыталык” ырыалара дорҕоонноохтук ылланан сүрэхтэннилэр. Истиҥ-иһирэх көрсүһүү уопсай хаартыскаҕа түһүүнэн түмүктэннэ.
Алаас Кыыһа ийэ кутуҥ дириҥ иэйиилээх хоһоонноруҥ, дьиктитик кутуллар матыыптарыҥ, поэзия алыптаах хонуутугар суолларыҥ кэҥээн истиннэр, ааҕааччыларгын Кэрэҕэ, Сырдыкка улуу куйаарга угуйа, сирдии тур, иэйэ-куойа сырыт диэн сахалыы сэмэйдик алгыспытын аныыбыт.
Ааҕааччыны кытта үлэлиир салаа
