Ыам ыйын 8 күнүгэр Сэргэй Сибиэрэп аатынан норуот айымньытын киинигэр «Бойобуой доҕордоһуу чаҕылхай туоһулара…» диэн саҥа кинигэ сүрэхтэниитэ буолан ааста. Кинигэ сүрүн геройдара – биһиги биир дойдулаахпыт, РФ уонна ДНР геройа Дмитрий Егоров-«Сунтаар» уонна кини бойобуой доҕоро Николай Романов-«Ронин».
Бу икки ыраах-ыраах улуустар уолаттара СВО-ҕа тылланан барыахтарыттан тиһэх күннэригэр диэри олохторун, сырыыларын ааптар кинилэр атын доҕотторун кытта сибээстэһэн, кэпсэтэн, докумуоннарга олоҕуран суруйбут. Документальнай ис хоһоонноох кинигэни Дмитрий биир дойдулааҕа, бэйэтэ эмиэ муора пехотатыгар 1978-1980 сс. сулууспалаабыт Эдуард Еремеев ураты буочарынан суруйан, дьоҥҥо-сэргэҕэ тиийимтиэ гына кыайа туппута бэлиэтэннэ.
Бибилэтиэкэ тэрээһинэ буоларын быһыытынан, кэлбит ыалдьыттарга Дмитрий Егоров туһунан, анал байыаннай дьайыы дьоруойдарын кэпсиир кинигэ быыстапкатын итиэннэ Эдуард Еремеев кинигэлэрин, хаһыакка тахсыбыт суруйууларын кыл. библиограф Чирикова Л.В. билиһиннэрдэ.
Николай Алексеевич Егоров уолун оҕо эрдэҕинээҕитин, хорсун быһыытын кэлбит дьоҥҥо кэпсээтэ уонна устунан, бэйэтэ эппитинии, мустубут дьоҥҥо “Эр санааланыы уруогун” ыытта.
Тэрээһиҥҥэ улууспут уонна нэһилиэкпит баһылыктара, улуус бэтэрээннэрин сэбиэтин бэрэссэдээтэлэ, Уһун Күөлтэн баһылык солбуйааччыта, СТК директора эҕэрдэ суруктары, өйдөбүнньүк бэлэхтэри туттартаатылар. СХПК “Благо-8” салайааччыта Дьоруой аҕатыгар Николай Алексеевичка уонна ааптар Эдуард Егоровичка иккиэннэригэр тарбыйах бэлэхтээтэ.
Кинигэ сүрэхтэниитигэр Сунтаар алын сүһүөх оскуолатын үөрэнээччилэрэ Арслан Христофоров, Дамир Корякин «Биэс уолаттарым» диэн В. Стручков ырыатын, СПТЛ-и үөрэнээччитэ Анжелина Тихонова Дмитрийга-“Сунтаарга” анаммыт Чэлгийээнэ хоһоонун, СТК устудьуоннара фронтовик-поэт И. Артамонов хоһоонун, Анна Трифонова «Кыайыылаах» (Ульяна Ива, Д. Петров-Сион) диэн ырыаны кэлбит дьоҥҥо бэлэх ууннулар.
Сунтаар народнай театрын салайааччыта Е.А. Григорьева наһаа истиҥ ахтыыны оҥордо уонна Уһун Күөл туһунан ырыаны ыллаан сэргэхсийиини таһаарда.
Кинигэ сүрэхтэниитин кэмигэр Николай Романов-«Ронин» кэргэнэ Нюргуяна Романова видеонан Д. Егоров дьонугар, Сунтаар улууһун дьонугар-сэргэтигэр махтал тылларын эттэ.
Былааҥҥа кинигэ нууччалыы тылбаастанан, Арассыыйаны бүттүүн хабыахтааҕын, салгыы киинэ оҥорорго анаан кэпсэтиилэр бара туралларын сэгэтэн эттилэр. Өссө кинилэр ааттарын үйэтитэн, доҕордуу уолаттар сарын-сарынтан өйөнсүбүт пааматынньыктара сотору кэминэн Дьокуускай куоракка туруохтааҕын кэпсээтилэр.
Түмүгэр СТК общежитиетын үлэһиттэрэ минньигэс астаах фуршеттарын кэмигэр ааптар уонна Дьоруой аҕата илии баттааһыннаах кинигэлэри сорохтор бэлэх туттулар, сорохтор киирбит үп оҕолорго көмөҕө барарын истэн үөрэ-көтө атыыластылар.
Сунтаар киин бибилэтиэкэтин библиографияҕа уонна кыраайы үөрэтиигэ салаатын сэб. Иванова М.Х.
