Саха Өрөспүүбүлүкэтигэр Үлэ сылын чэрчитинэн, Сунтаар улууһун библиотекаларын ситимэ «Партизан» норуот айымньытын театральнай киинигэр, ыам ыйын 27 күнүгэр бэлиэтэнэр Бүтүн Арассыыйатааҕы библиотекалар күннэригэр сөп түбэһиннэрэн, Саха Өрөспүүбүлүкэтин култууратын Үтүөлээх үлэһитэ, ССРС култууратын туйгуна, Сунтаар улууһун Бочуоттаах гражданина, библиотека эйгэтигэр өр сылларга ситиһиилээхтик үлэлээбит, култуура бэтэрээнэ Розалия Николаевна Степанова аатынан бириэмийэ туттарыытын үөрүүлээх түһүлгэтин тэрийдэ.
Бу бириэмийэни Розалия Николаевна дьиэ кэргэнэ — уола Алексей Константинович Степанов уонна сиэннэрэ олохтоотулар. Күндү ыалдьыттарынан Розалия Николаевна өр сылларга үлэлээбит библиотекатын бэтэрээннэрэ, ырыа кэрэ эйгэтинэн алтыспыт “Алгыс” бэтэрээннэр кулууптарын кыттыылаахтара, араас кэмнэргэ бииргэ үлэлээн ааспыт чугас дьоно, доҕотторо кэлбиттэр. Кэлбит дьон Розалия Николаева Степановаҕа аналлаах быыстапкалары, ол курдук, араас кэмнэргэ таһаарбыт уонна үлэлэспит кинигэлэрин, кини наҕараадаларын, библиотека үлэтин кэпсиир урукку хаартыскалар альбомнарын көрдүлэр-иһиттилэр. Маны таһынан, «Сунтаар бибилэтиэкэлэрин кинигэлэрэ», «Кинигэлэр үйэлэри уҥуордаан…» уонна «Айар дьоҕур иэйиитэ» диэн библиотекарьдар бэйэлэрин оҥоһуктарын ааҕааччыларга көрдөрөн интэриэстэрин тартылар. Тэрээһиҥҥэ кэлбит ыалдьыттарга библиотечнай ситим таһаарбыт кинигэлэрин тастарын кыччатан оҥорон, суулаан кыра “минньигэс кинигэлэри” — шоколадтары туттартаан соһуттулар.
Тэрээһин үөрүүлээх чааһа Сунтаар улууһун библиотекаларын ситимигэр өр сылларга үлэлээн ааспыт бэтэрээннэри чиэстээһинтэн саҕаланна. Билигин үлэлии сылдьар эдэр коллегалара библиотека эмблемалаах шарфиктары, эҕэрдэ суруктары, сибэкки дьөрбөтүн туттардылар уонна “Библиотекарь кыргыттар” диэн өрөспүүбүлүкэбит бары муннуктарыгар ылланар ырыаны бэлэх ууннулар.
Онтон «Сунтаар улууһа (оройуона)» МО баһылыгын экономическай сайдыыга уонна стратегическай былааннааһыҥҥа солбуйааччы Борис Серафимович Васильев эҕэрдэтин уонна махталын тиэртэ. Улуус үрдүк наҕараадаларын өр сылларга үтүө суобастаахтык үлэлии сылдьар Валентина Егоровна Степановаҕа, Саргылана Федотовна Спиридоноваҕа, Андрей Спиридонович Индеевкэ үөрүүлээх быһыыга майгыга туттарда.
Дьэ, ол кэнниттэн, Сунтаар улууһугар библиотека эйгэтигэр аан бастаан ыытыллар Розалия Николаевна Степанова аатынан анал бириэмийэ лауреаттара ааттаннылар. Ол курдук, “Бастыҥ үлэлээх бибилэтиэкэр” номинацияны Кэмпэндээйи олохтоох бибилэтиэкэтин сэбиэдиссэйэ Местникова Татьяна Ивановна уонна Сунтаардааҕы оҕо бибилэтиэкэтин библиограба Римма Николаевна Павлова бастакынан ылар чиэскэ тигистилэр. Онтон “Ааҕыыны бастыҥ көҕүлээччи” номинацияны А. П. Павлов аатынан Сунтаар № 1 орто оскуолатын библиотекара Ирина Николаевна Сивцева тутан үөрдэ-көттө. Лауреаттарга Степановтар дьиэ кэргэттэрэ анал бэлиэни уонна бириэмийэни, бибилэтиэкэ салайааччыта Изабелла Жиркова лауреат дипломун туттардылар. Үрдүк сыанабылы ылбыт Татьяна Ивановнаҕа депутаттар улуустааҕы Сэбиэттэрин бэрэссэдээтэлин солбуйааччы О Юрий Дмитриевич улуус Сэбиэтин Бочуотунай грамотатын туттарда. Римма Николаевна Сунтаар нэһилиэгин аҕа баһылыга Эдуард Филиппов эҕэрдэтин тутан долгуйда. Ирина Николаевнаны Сунтаар улууһун үөрэҕириитин салалтатыттан Джулия Владимировна Александрова уонна оскуола библиотекарьдара эҕэрдэлээтилэр.
Ийэлэрэ, эбэлэрэ, хос эбэлэрэ Розалия Николаевнаны кытта бииргэ үлэлээбит библиотека бэтэрээннэригэр Степановтар дьиэ кэргэттэрэ — ис сүрэхтэн махтал тылларын анаатылар, ийэлэрин аатын курдук роза сибэккилээх торт бэлэх ууннулар. Алексей Константинович бу бириэмийэни сыл аайы туттарарын туһунан эттэ уонна бу бачыымы атын бэтэрээннэр дьиэ кэргэттэрэ өйүүллэригэр ыҥырда.
Үөрүүлээх тэрээһин манан эрэ бүппэтэ, быйылгы сылга улуус үбүлүөйдээх бибилэтиэкэлэригэр Сунтаар улууһун бэтэрээннэрин сэбиэтин аатыттан Афанасий Кириллович Васильев, нэһилиэктэр аҕа баһылыктара эҕэрдэлэрин уонна аан дойдуга саамай күндү бэлэҕи – кинигэни туттартаатылар. Бэлиэтээн эттэххэ, Бордоҥ, Бүлүүчээн, Куокуну, Кутана, Күндэйэ, Түбэй-Дьаархан, Хадан, Арыылаах библиотекалара быйыл төрүттэммиттэрэ 70 сылларын, Кириэстээх, Кэмпэндээйи – 75 сылларын, Тойбохой библиотеката –85 сылын бэлиэтииллэр. Улуус култууратын уонна бибилэтиэкэ эйгэтин сайдыытыгар кылааттарын иһин СӨ култууратын уонна духуобунай сайдыыга Министерствотын Бочуотанай грамоталарынан Кутанаттан Зоя Григорьевна Кириллина уонна Сунтаардааҕы оҕо бибилэтиэкэтиттэн Марфа Егоровна Спирова, СӨ Национальнай библиотекатын Бочуотунай грамоталарынан Анатолий Львов, Сергей Иванов, Мария Андреева наҕараадаланнылар. Улуустааҕы култуура саламтатын, кииннэммит библиотечнай ситим үрдүк наҕараадаларын Саргылана Генерова, Мария Алексеева, Василисса Андреева, Жанна Генерова, Ньургуяна Кобельянова, Мария Федорова, Ольга Оконешникова, Татьяна Митрофанова туттулар.
Сунтаар нэһилиэгин, улууһун тэрилтэлэрэ бииргэ үлэлэһэр бибилэтиэкэлэрин Арассыыйаҕа бибилэтиэкэлэр күннэрин көрсө эҕэрдэлэрин эттилэр, музыкальнай нүөмэрдэри бэлэхтээтилэр.
Тэрээһин үһүс блогунан “Ааҕар Сунтаар” бырайыак чэрчитинэн Л. А. Попов аатынан Сунтаар улууһун киин бибилэтиэкэтэ Дьиэ кэргэн күнүгэр анаан ыыппыт “Ааҕыы абылаҥа” диэн сахалыы баай бибилэтиэкэлээх дьиэ кэргэн улуустааҕы күрэһин кыайыылаахтарын чиэстээһин буолла. Маны таһынан, биир дойдулаахпыт СӨ суруйааччыларын сойууһун чилиэнэ, Н. А. Кондаков аатынан теле-араадьыйа суруналыыстыкаҕа Ил Дархан бириэмийэтин хаһаайката, СӨ култууратын туйгуна Ангелина Шадринова-Суоһааны үбүлүөйдээх сааһынан Уйбаан Нуолур аатынан Элгээйи олохтоох бибилэтиэкэтин көҕүлээһининэн «Суоһааны сааскыта» диэн тэрээһин чэрчитинэн Сунтаардааҕы кииннэммит бибилэтиэкэ ситимин филиалларын икки ардыгар ыытыллыбыт «Биир кинигэ быыстапката» айар күрэс түмүктэннэ.
Бу киэһэ мустубут дьон тэрээһинтэн бары үөрэн-көтөн, дуоһуйан тарҕастылар.
