Л.А. Попов аатынан Сунтаардааҕы киин бибилэтиэкэҕэ сылын ахсын ыытыллар «Библиосумерки-2025» социальнай-культурнай аахсыйа ыытылынна. Быйылгы аахсыйа 2025 сыл Арассыыйаҕа Аҕа дойдуну, Саха сиригэр Ийэ дойдуну көмүскээччилэр уонна Улуу Кыайыы 80 сылыгар ананна. Бу күн бибилэтиэкэ үлэһиттэрэ араас интэриэһинэй оонньуулары, биктэриинэлэри оонньоттулар. Ол курдук Аҕа дойду сэриитин кэмигэр буолбут умнуллубат сүрүн кыргыһыылар ааҕааччылар, ыалдьыттар өйдөрүгэр-сүрэхтэригэр хааларын курдук тэрийдилэр. Сунтаар киин бибилэтиэкэтин үлэһиттэрэ бу тэрээһиҥҥэ болҕомто ууран олус интэриэһинэй оонньуулары толкуйдаан хос аайы элбэх интэриэһинэй бэсиэдэлэри иһитиннэрдилэр, оонньууларга оонньоттулар, ол курдук, ааҕар саала “Москуба анныгар кыргыһыы” диэн тиэмэни ылан бу туһунан Раиса Павлова олус интэриэһинэй бэсиэдэни уонна «Ни шагу назад — позади Москва» диэн кинигэ быыстапкатын кытта билиһиннэрдэ. Салгыы “По страницам истории” диэн үс түһүмэхтэн турар (Аҕа дойдуну көмүскүүр Улуу сэрии, хаартысканы таайыы уонна СВО-анал байыаннай дьайыы) интеллектуальнай оонньууну ыытта. Манна барыта түөрт хамаанда кыттыыны ылла: Сунтаар гуманитарнай гимназията, “Бастыҥнар хамсаныылара”, Сунтаар маҥнайгы нүөмэрдээх уонна иккис нүөмэрдээх оскуола үөрэнээччилэрэ. Уопсай түмүгүнэн 1-кы миэстэни Сунтаар бастакы нүөмэрдээх оскуолата, 2-с миэстэни — гимназия үөрэнээччилэрэ, 3-с миэстэни — “Бастыҥнар хамсаныылара” ыллылар. Хас биирдии хамаандаҕа грамота, өйдөбүнньүк бэлэхтэр уонна туоһу суруктар туттарылыннылар.
Оҕо бибилэтиэкэтин салаата ыалдьыттарга анаан «За Сталинград!» хаартыскаҕа хатанарга аналлаах фотозона, «Сталинград: 200 дней мужества и стойкости» кинигэ быыстапкатын туруорда. Үлэһиттэр оҕолорго Сталинград кыргыһыытыгар аналлаах квиз-оонньуу ыыттылар. 1-кы станция — «Разминка для ума» Волгоградка баар памятниктары таайыы, сэриигэ сыһыаннаах тыллар көппүт буукубаларын туруоруу. 2-с станция — «Военный госпиталь» медицинскэй тиэрминнэри таайыы уонна суһал көмөнү оҥорор аптечканы хомуйуу. «Концертная бригада» — сэрии тематыгар ырыалары, хоһооннору толоруу. З-с станция — «Меткий стрелок». Сэрии сүрүн даталарын таайан ол сыыппараларынан сыал ытыы тэрилиннэ. Сталинград кыргыһыытын тематыгар кроссворду быыстапка кинигэлэриттэн булан таайыы. 4-с станция — «Отгадай ребус». Сталинград сэриитин туһунан викторина уонна станцияларынан бастакы бүтэн кэлбит хамаандаларга пазл таҥааһына буолла. Хас биирдии кыттааччыларга туоһу сурук туттарылынна.
Кинигэнэн хааччыйар салаа үлэһиттэрэ олус интэриэһинэй оонньуулары ыытан элбэх оҕо үмүөрүһэ түстэ. Хос тиэмэтэ — «Курскай тоҕойугар кыргыһыы». Барыта 50 оҕо кытынна (СНОШ, СПТЛ-и, Сунтарская гимназия, СОШ #1). «Курскай тоҕойугар кыргыһыы» видеопрезентация билиһиннэриитин, кинигэ быыстапкатын оҕолор олус интэриэһиргээн, сэргээн иһиттилэр. «Курскай дугаҕа кыргыһыы» уонна «Таанка кыргыһыылара» диэн остуол оонньууларын сэргээтилэр. «Таанка кыргыһыылара» оонньууга кылаан кыайыылаах кыраларга: Заболоцкай Давид (СНОШ, 2 кыл.), улахан оҕолорго Васильев Арсен (СОШ #1, 6 «б» кыл.) буоллулар. «Курскай тоҕойугар кыргыһыы» оонньууга хамаанданан 1 нүөмэрдээх оскуола оҕолоро кыайыылаах буоллулар.
Библиографияҕа, кыраайы үөрэтиигэ салаа уонна методическай-информационнай салаа кыттыһаннар герой-куорат Ленинград туһунан кэпсиир кинигэ быыстапкатын, фотозонаны, викторинаны, “Блокадная ласточка” аахсыйаны уонна маастар-кылааһы ыыттылар. Кэлбит оҕолор бары кинигэ быыстапкатын сэргээн иһиттилэр, ол кэнниттэн баҕа санааларын хараҥаччы суругар суруйдулар.
Эр санааланыы бэлиэтэ буолбут гвоздика сибэккини оҥорор маастар-кылаас уонна урукку кэми көрдөрөр фотозона кыттааччылар урамньыны ылынар дьоҕурдарын уһугуннарда уонна иэйиилэрин бу айымньылаах үлэ нөҥүө этэллэригэр көмөлөстө. Ол курдук, оҕолор сибэкки оҥорорго үөрэннилэр уонна «Эйэлээх халлааны, дьоллоох олоҕу, аччыктааһын диэни билбэт буолуҥ» диэн уо.д.а баҕа санааларын суруйдулар. Онтон хаартыскаҕа хатанан бу күнү өйдөрүгэр-санааларыгар илдьэ бардылар диэн тэрийээччилэр эрэнэ хаалабыт.
Информационнай-коммуникационнай салаа бу тэрээһиҥҥэ «Ильмень күөлгэ кыргыһыы» туһунан электроннай кинигэ быыстапкатын бэлэмнээтэ. Манна тэрээһин кыттыылаахтара Саха норуотугар ыар сүтүктээх кыргыһыы туһунан архыып докумуоннарыгар олоҕурбут историяны көрдүлэр. Ону сэргэ Аҕа дойду сэриитигэр сылдьыбыт биир дойдулаахтарын ааттарын, бойобуой суолларын үйэтитэр сыаллаах «Өлбөт үйэлээх полк (Бессмертный полк)» анал сайты кытта билиһиннэрдилэр. Калашников автоматын ыһарга уонна хомуйарга оҕолор бириэмэҕэ күөн көрүстүлэр. Мария Томская, салаа сүрүн бибилэтиэкэрэ, улахан дьоҥҥо аналлаах оҥоһуу өйү күннээҕи олоххо туһаныыга маастар-кылаас ыытта.
Улахан дьон – учууталлар, ийэлэр-аҕалар, убайдар-эдьиийдэр, эбээлэр-эһээлэр оҕолору кытта тэҥҥэ кэлэн, үүнэр көлүөнэбитин патриотическай өйгө-санааҕа иитэргэ күүс-көмө буолбуттарыгар барҕа махталбытын биллэрэбит. Маннык тэрээһиннэр оҕолорго, эдэр дьоҥҥо уруккуну умнубаттарыгар, инники кэскиллэрэ сырдык буоларыгар эрэли уонна итэҕэли үөскэтэр. Ити курдук, бу тэрээһин Сунтаар араас көлүөнэ дьонугар биир уопсай санааны сахта.
