Ыам ыйын 27 күнэ- Арассыыйа үрдүнэн бибилэтиэкэ күнэ. Бу күн эрэллээх ааҕааччыларбытыгар бүтүн Арассыыйа үрдүнэн ыытыллар «Библиосумерки-2023» социальнай-культурнай аахсыйа ыытылынна.
Быйыл 10-с төгүлүн ыытыллар «Библиосумерки» аахсыйабыт Арассыыйаҕа уһуйааччы уонна аҕа сүбэһит, Саха сиригэр Үлэ, Сунтаар улууһугар Төрөөбүт төрүт тыл сылын чэрчитинэн ыытылынна. Аахсыйа үөрүүлээх чааһын Л. А. Попов аатынан Сунтаардааҕы киин бибилэтиэкэ салайааччыта Изабелла Ивановна Жиркова эҕэрдэ тылынан уонна кырачаан ааҕааччыбыт Айсана Иванова «Күнү үөрэ көрсөбүн” диэн эҕэрдэ ырыатынан үөрүүлээхтик аһылынна. Салгыы акция кыттааччылара, бибилэтиэкэ үлэһиттэрэ бэлэмнээбит араас интэриэһинэй оонньууларыгар, күрэхтэригэр көхтөөх кыттыыны ыллылар. Ол курдук, эпоксиднай килиэйтэн харысхал оҥоруутугар (маастардар Альмира Иванова, Наталия Иванова), валяние ньыматынан оҥоһукка (маастар Саргылана Петрова) маастар-кылаастар ыытылыннылар. Маны сэргэ “Тыл оонньуута” диэн интерактивнай оонньууга биирдиилээн кыайыы иһин 8 эдэр ыччат күөн көрүстэ. Түмүгэр:
1 миэстэ — Иванова Лидия (СПТЛИ 8 кыл.үөрэнээччитэ)
2 миэстэ — Лаптев Михаил (СТК студена)
3 миэстэ — Павлов Алеша (СТК студена) ыллылар.
Альберт Бүлүүйүскэй “Сайын» айымньытыттан мүнүүтэҕэ ааҕыыга барыта 16 эдэр ыччат көхтөөх кыттыыны ылла. Кыайыылаахтарынан — 1 миэстэ — Афанасьева Мира (176 тыл)
2 миэстэ — Лаптев Михаил (123)
3 миэстэ — Афанасьева Ира (118) буоллулар.
Сунтаарбыт улууһун суруйааччыларын сырдатыыга араас таһымнаах үлэлэр мэлдьи ыытыллаллар. Бу да сырыыга үөрэтэр, сырдатар сыаллаах “Суруйааччыны таай” диэн олус интэриэһинэй оонньуу ыытылынна. Манна Эдуард Соколов, Уйбаан Нуолур, Альберт Бүлүүйүскэй, Леонид Попов уонна Күндэ мэтириэттэрин мозаика ньыматынан таҥан күрэхтэстилэр. Барыта 18 оҕо кыттан, туоһу сурук уонна минньигэс бэлэхтэри туттулар.
Маны таһынан, Сунтаарбыт нэһилиэгин коллекционердара (Лидия, Александр Архиповтар, Роберт Софронов, Маргарита Спирова) үгэскэ кубулуйбут көрсүһүүлэрэ буолла. Коллекционердар араас сылларга тахсыбыт кумааҕы, тимир харчыларын, значоктарын, открыткаларын, кэмбиэрдэрин оҕолор олус сэҥээрэн көрдүлэр.
Кинигэнэн хааччыйар салаа үлэһиттэрэ “Ааҕыҥ, үөрэтиҥ, оонньооҥ” диэн өбүгэ оонньууларын тэрийэн ыыттылар. Манна саха туттар малыттан саҕалаан өс хоһооннорун ситэрии, Сунтаар улууһун каартатын таҥыы, муоска кыл мээчиги киллэрии, кыл мээчигинэн сыалы табыы, саһаан туруоруута, хабылык, хаамыска оонньоттулар. Саамай элбэх мээчиги киллэрэн 1-кы миэстэни — Иванова Лидия (СПТЛИ үөрэнээччитэ), улуус каартатын таҥыыга 1 миэстэни — Алексеев Милан (№1 ССОШ 5 кыл.), хабылыкка хаамыскаҕа 1 миэстэни — Тимофеева Эвелина (СНОШ 3 кыл.) ыллылар.
Васильева Мария Васильевна салайар «Тобул» остуол оонньуутун кулуубугар оҕо-аймах сыл устата сөбүлээн сылдьар. Бу күҥҥэ кини саҥаттан саҥа оонньуулары оонньотон элбэх оҕо сэҥээриитин ылла уонна бибилэтиэкэҕэ “Үтүөҕэ-сырдыкка уһуйар “Чебурашка” дьыссааппыт” диэн кинигэни бэлэх уунна.
Бибилэтиэкэ иһинэн саҥа тэриллибит “Саас” эдэр суруналыыстар кулуубтарын кытааччыларыгар «Саха көрдөрөр-иһитиннэрэр хампаанньа” Сунтаардааҕы филиалын уопуттаах суруналыыһа Мира Афанасьева суруналыыс үөрүйэхтэригэр сүбэ-соргу биэрдэ, маны сэргэ тутатына репортаж матырыйаалларын бэлэмнээн “Кэскил” хаһыакка ыыттылар.
Түмүккэ хаалбыт, эрэллээх ааҕааччыларга режиссер Степан Бурнашев дьон-сэргэ сэҥээриитин ылбыт “Айта” киинэтэ көрдөрүлүннэ.
Ааҕааччыны кытта үлэлиир салаа
