Сунтаар улууһун маҥнайгы поэтессата, Норуоттар икки ардыларынааҕы суруйааччылар сойуустарын чилиэнэ, СӨ култууратын туйгуна Саргылаана Спиридонова — Кэрэмэс Кийиитэ төрөөбүтэ 70 сылыгар аналлаах “ДЬЫЛҔАМ МИИГИН АНААБЫТА ДЬОЛЛООХ КИҺИ БУОЛАРБАР…” ахтыы дьоро түһүлгэтин чэрчитинэн ыытыллыбыт “Ыллаа—хатыҥ тыллыыта, ыллаа–күһүн кэлиитэ!” ырыа буолан көппүт хоһооннорун түһүлгэтэ уонна кини хоһооннорун дорҕоонноохтук, истиҥ иэйиилээхтик ааҕыы күрэһэ үрдүк таһымҥа ааста. Ахтыы киэһэтигэр поэтесса хоһоонноругар биир дойдулаахтарбыт Людмила Спиридонова-Сунтаар Күөрэгэйэ, Анна Тотонова-Күн Күөрэгэйэ, Анна Трифонова, Юлия Филиппова уо.д.а. ырыалара дууһаны долгуттулар, абылаатылар.
Хоһоон күрэһигэр Сунтаартан, Маар Күөлтэн, Бүлүүчээнтэн, Күндэйэттэн, Кутанаттан, Түбэйтэн, Элгээйиттэн, Арыылаахтан, Тойбохойтон, Кириэстээхтэн, Аллыҥаттан барыта 30 киһи кыттыыны ылла, ол иһигэр 3 бөлөх. Дьүүллүүр сүбэҕэ үлэлээтилэр: Арассыыйа суруналыыстарын, СӨ суруйааччыларын сойууһун чилиэнэ, СӨ култууратын Үтүөлээх үлэһитэ, Сунтаар улууһун Бочуоттаах олохтооҕо, Саха сирин норуотун суруйааччыта, Саха национальнай көрдөрөр-иһитиннэрэр хампаанньа эрэдээктэрэ Наталья Владимировна Михалева–Сайа, Арассыыйа Суруйааччыларын уонна Саха сирин Суруйааччыларын сойуустарын чилиэнэ, тылбаасчыт, суруйааччы, Өрөспүүбүлүкэ уус-уран оҥоһуктарын маастара, Кутана нэһилиэгин бочуоттаах олохтооҕо, иистэнньэҥнэр “Ситии”, ырыаһыттар “Үс кут” түмсүүлэрин салайааччыта, айар-суруйар дьарыктаах “Ньургуһун” литературнай түмсүү сүрүннүүр сүбэһитэ Валентина Григорьевна Дьячковкая–Хара Көмүс, Саргылана Семеновна-Кэрэмэс Кийиитин кыыһа Наталия Вячеславовна Асамова.
Уран тылы оһуордуур, уус тылы чочуйар Поэзия хас биирдии ахтыы дьоро киэһэтин ыалдьытын тургутта, санаатын таарыйда. Күрэс түмүгүнэн Сунтаартан муҥутуур кыайыылаах “Кылаан чыпчаал” Людмила Пустолякова-Дьэрэлийэ Күндээр поэтесса оҕолоро туруорбут смарт-телевизорынан, «Кэскиллээх ааҕааччы» анал ааты Вася Контогоров Маар-Күөл администрацията “Татыйыына” фирмаҕа 5000солк. сэртипикээтинэн, «Иэйиилээхтик ааҕыы» анал ааты Зинаида Федотова-Дьол Кыыма Сунтаар улууһун култууратын уонна айылгытын салалтатыттан сахалыы халандаарынан, кинигэнэн, Элгээйиттэн «Умсугутуулаах ааҕыы» анал ааты Изабелла Макарова-Толоон Туорааҕа Сунтаардааҕы кииннэммит бибилэтиэкэ ситимэ туруорбут 3000солк. уу харчынан уонна Саргылаана Спиридонова-Кэрэмэс Кийиитин бииргэ төрөөбүттэрин биһирэбил бириистэрин сахалыы көбүөрү Тойбохойтон Клара Тихонова ыллылар. Тэрийээччилэр ааттарыттан бириистэри туруорбуттарга улахан махталбытын биллэрэбит.
Тэрээһин кыттааччылара Саргылаана Спиридонова-Кэрэмэс Кийиитэ хоһоонноро киһи өйүгэр -сүрэҕэр сөҥөрүн, үрдүккэ, сырдыкка, кэрэҕэ тардарын өссө төгүл астынан бэлиэтээтилэр.
Сунтаар киин бибилэтиэкэтин ситимин методико-информационнай
салаатын кылаабынай бибилэтиэкэрэ Алёна Портнягина
