1769 с. кэминээҕи бу суолталаах күҥҥэ Екатерина II ыраахтааҕы Сибэтиэй Георгий уордьанын туттарбыт күнүгэр сөп түбэһиннэрэн, 2007 сыллаахха “Арассыыйаҕа Албан аат уонна бэлиэ күн туһунан” Федеральнай сокуонунан Ахсынньы 9 күнэ – Арассыыйаҕа Аҕа дойду Дьоруойдарын күнүнэн биллэриллибитэ.
ССРС кэмигэр Сэбиэскэй Сойуус Дьоруойа, Социалистическай Үлэ Дьоруойа, 3 степеннээх Албан Аат Уордьана, 1992 сылтан Российскай Федерация Геройа судаарыстыбаннай наҕараадалар олохтоммуттара.
Арассыыйа судаарыстыбата тэриллиэҕиттэн билиҥҥи кэмҥэ диэри биһиги дойдубут героическай историята киэҥ. Арассыыйа норуота ханнык да өстөөххө бэриммэккэ дойдубут көҥүлүн иһин хорсуннук турунан Аҕа дойдутун көмүскээбитэ. Кинилэр олохторо кэнчээри ыччапытыгар Дойдуга бэриниилээх буолуу, Ийэ дойдуга таптал холобурунан буолаллар.
Бу күн Арассыыйа, Сэбиэскэй Сойуус Дьоруойдарын, Сибэтиэй Георгий Уордьан уонна Албан Аат Уордьанын кавалердарын чиэстииллэр.
Бу бэлиэ күҥҥэ сөп түбэһиннэрэн, эдэр көлүөнэ ыччакка билиһиннэрэр сыалтан, Арассыыйаҕа Аҕа дойду геройдарын күнүгэр аналлаах Сунтаар киин библиотекатын үлэһиттэрэ Павлова Р.И., Генерова С.Р. гимназия оскуолатын 7б, 8а, 9а кылаас үөрэнээччилэригэр бибилэтиэчинэй уруок ыыттылар. Уруок саҕаланыытыгар урукку кэми сэгэтэн, туруу үлэһит дьоммутун, хорсун хоодуот уолаттарбытын дьоруой дьоммут ааттарын, олохторун билистилэр. Маны таһынан улуус Дьоруойдарын кинигэтин билиһиннэрдилэр уонна үөрэнээччилэр тургутукка хоруйдаатылар.
Суруйда Л.А.Попов аатынан Сунтаардааҕы киин бибилэтиэкэ ааҕар саалатын кылаабынай бибилэтиэкэрэ Саргылана Генерова
