Муус устар 19 күнүгэр Сунтаар киин библиотекатыгар үгүс киһи муһунна, үөрдэ-көттө. Тоҕо диэтэххэ, бүтүн Арассыыйа үрдүнэн ыытыллар «Библиосумерки – 2024» ааксыйа биһиги бибилэтиэкэбитигэр 10 төгүлүн ыытылынна. Мустубут дьону эҕэрдэ ырыанан кырачаан ааҕааччыбыт Айсаана Иванова аста. Бу күн, чуолкайдаатахха киэһэ, дойдубут 750-тан тахса библиотекалара, кинигэ маҕаһыыннара, литературнай музейдара ааннарын тэлэччи аһаллар, араас интэриэһинэй тэрээһиннэри ыыталлар. Ол курдук, араас маастар-кылаастар, викториналар, оонньуулар элбэх киһини түмэллэр, сэргэхситэллэр.
Быйылгы «Библиосумерки» акциябыт Арассыыйаҕа Дьиэ кэргэн, Өрөспүүбүлүкэҕэ Оҕо саас уонна Сунтаарбыт улууһугар Аҕам саастаахтар сылларын чэрчитинэн ыытылынна.
Бастатан туран, эрдэттэн биллэриллибит “Семейная книжная реликвия” диэн кинигэ быыстапката ыытыллыбытын түмүгүн таһаардылар, кыайыылаахтарга бириистэри туттартаатылар. Кинилэри эҕэрдэлээн, Алгыстаана Федорова “Звездное река” ырыатын ыллаата.
Бүгүҥҥү тэрээһин чэрчитинэн «Ньургуһун» литературнай түмсүү чилиэнэ Варвары Максимова-Тырымнаайы «Ыллыыр ырыам» диэн саҥа кинигэтэ сүрэхтэннэ.
Маны тэҥэ мустубут оҕолорго бибилэтиэкэ отделлара бары араас интэриэһинэй оонньуулары толкуйдаан оонньоттулар. Оҕо бибилэтиэкэтин үлэһиттэрэ бука бары остуоруйа дьоруойдара буоланнар, «В гостях у Лукоморья» ыалдьыттаттылар. Атын да отделлар «К.К.К.» – көрдөөх киэһэ куоталаһыах!», «Почитаем, поиграем!», аныгы сахалыы оонньуулары, таба быраҕыыны, таба көрүүнү эрчийэр эстафетаны тэрийэн мустубут оҕо аймах интэриэһин тартылар. Маны тэҥэ, улахан дьоҥҥо «Пушкинскай картаны» уонна «К врачу» приложенияны туруордулар, сүбэ-соргу биэрдилэр. Дьон интэриэһин өссө «Петуния үүннэриитин кистэлэҥнэрэ» маастар-кылаас тутта. Кэлбит оҕо дьон “Биэс ынахтаах Бэйбэрикээн эмээхсин” норуот остуоруйатынан устуллубут киинэҕэ “Киноквиз” оонньоотулар. Бу оонньууларга барытыгар минньигэс бириистэри дэлэйдик ыланнар оҕолор дуоһуйа сынньаннылар.
Ааҕар саала сүрүннүүр библиограба Мария Иванова
