2023с. Сунтаар улууһугар төрөөбүт төрүт тыл сылын чэрчитинэн, С.А.Сибиэрэп –Кыыл Уола төрөөбүтэ 125 сылын көрсө И.И.Макарова -Толоон Туорааҕа “Таас Буурай бухатыыр” олоҥхону дьиэ кэргэнинэн ааҕабыт» улуустааҕы уус-уран ааҕыы көрүү-күрэһэ биллэриллибитэ. Тэрийээччилэр: Сунтаар улууһун култууратын уонна айылгытын салалтата, Сунтаар улууһун үөрэҕириитин салалтата, Сунтаардааҕы кииннэммит бибилэтиэкэ ситимэ. Көрүү-күрэс 3 түһүмэҕинэн ыытыллар: 1-кы түһүмэх 2023с. сэтинньи 25 күнэ – олунньу 13 күнэ; 2-с түһүмэх олунньу 13 күнэ – ыам ыйын 15 күнэ 2024с., 3-с түһүмэх ыам ыйын 15 күнэ – бэс ыйын 20 күнэ 2024с.
Сыала-соруга:Дьиэ кэргэнинэн кинигэни ааҕыыны көҕүлээһин, олоҥхону саха норуотун героическай эпоһын быһыытынан билиһиннэрии, “Таас Буурай бухатыыр” олоҥхону ааҕан, төрөөбүт тылбыт бараммат баайын, сүмэтин иҥэринии, дьиэ кэргэҥҥэ сахалыы саҥарар эйгэни олохтооһун, саха тылын баайын, сүмэтин табатык туттарга, өйдүүргэ иитии, бастыҥ олоҥхону ааҕар дьиэ кэргэни киэҥ эйгэҕэ билиһиннэрии, видеонан үлэлэри оҥорон бастыҥ ааҕар дьиэ кэргэттэри үйэтитии, пуондаҕа харайыы, Сунтаар улууһун “Ньургуһун” түмсүү чилиэнэ, олохтоох ааптара, олоҥхолооһун үгэстэрин сөргүтээччи, билиҥҥи кэм олоҥхоһута Макарова Изабелла Ивановна аатын, кини “Таас Буурай бухатыыр” олоҥхотун үөрэтии, үйэтитии.
Быйыл Арассыыйаҕа Дьиэ кэргэн, СӨ оҕо саас, Сунтаар улууһугар аҕам саастаах дьоҥҥо ытыктабыл, Сунтаардааҕы кииннэммит бибилэтиэкэ ситимигэр оҕо ааҕыытын сыллара биллэринэн көрүү-күрэс салҕыы көхтөөхтүк салҕанна. 1-кы түһүмэх Сунтаар улууһун 16 нэһилиэктэригэр ыытылынна. Барыта нэһилиэктэргэ ааҕыыны, кинигэни өрө туппут 51 дьиэ кэргэнэ (297 киһи) көхтөөх кыттыыны ыллылар.
2-с түһүмэххэ Александровтар (Кутана), Федоровтар (Бүлүүчээн), Павловтар (Дьаархан), Григорьевтар (Кириэстээх), Николаевтар (Куокуну), Архангельскайдар (Күүкэй), Яковлевтар (Сунтаар), Семеновтар (Тойбохой), Даниловтар (Түбэй), Еремеевтар (Бордоҥ), Ивановтар (Уустуйа), Поповтар (Хадан), Ивановтар (Элгээйи), Осиповтар (Аллыҥа), Герасимовтар (Кэппэндээйи), “Саһарҕа” түөлбэттэн Сергучевтар, Максимовтар, Арнольд Меняков, Зоя Варфоломеева (Күндэйэ) дьиэ кэргэттэрэ аастылар. Бу ыаллартан дьүүллүүр сүбэ быһаарыытынан 7 бастыҥ ааҕар дьиэ кэргэни быһаарыаҕа. Бастыҥ ааҕааччылар улуус ыһыаҕар “Таас Буурай бухатыыр” олоҥхону ааҕабыт” тэрээһиҥҥэ кыттыыны ылыахтара. Улуус ыһыаҕар “Таас Буурай бухатыыр” олоҥхону ааҕабыт” тэрээһиҥҥэ 3 бастыҥ ааҕар дьиэ кэргэн быһаарыллыаҕа, 3 бастыҥ олоҥхону ааҕар кыттааччы (улахан дьон) дьүүллүүр сүбэ быһаарыытынан Аммаҕа ыытыллар Өрөспүүбүлүкэтээҕи Олоҥхо ыһыаҕар уһун тыыннаах олоҥхону ааҕыыга кыттарга туоһу сурук тутуохтара. Бастыҥ олоҥхону ааҕааччы 7 дьиэ кэргэн “Таас Буурай бухатыыр” олоҥхону ааҕыыларын профессиональнай видеоҕа устуу, таҥан оҥоруу былааннанар.
Тэрийээччилэр ааттарыттан күрэскэ кыттыбыт дьиэ кэргэттэргэ улахан махталбытын биллэрэбит, ситиһиилэри баҕарабыт
