Төрөөбүт тыл уонна сурук-бичик күнүн чэрчитинэн “Аман өс – 2024” Бүлүү түбэтин уран тыллаахтарын ыҥырсыылаах күрэстэрэ буолан ааста.
Күрэһи Ольга Федорова аатынан улуус бибилэтиэкэлэрин кииннэммит ситимэ, улуус Ийэ тыл Сүбэтэ тэрийэн ыытта. Күрэскэ Үөһээ Бүлүүттэн икки уонна Сунтаар хамнаандата үс түһүмэххэ күөн көрүстүлэр.
Сунтаар улууһун хамаандатыттан Дьаархан баһылыгар Петр Тимофеев, Үөрэҕирии эйгэтиттэн Максим Захаров, Владислав Аргунов, Сардаана Афанасьева уонна Сунтаар ТВ-тан Тускулаана Горохова-Кобельянова кыттыыны ыллылар. Дьүүллүр сүбэҕэ «Ньургуһун» литературнай түмсүү салайааччыта Августина Попова-Кыыдаана үлэлээтэ.
“Аман өс – 2024” сүрүн сыалынан Ийэ тыл баайын, кыаҕын, устар ууну сомоҕолуур күүһүн сатаан сөпкө туттуу, суолтатын үрдэтии, туттуллар эйгэтин кэҥэтии, тыл этии үөрэҕэр тирэҕирэн, дьон-сэргэ ылынарын курдук бэйэ санаатын толору этэргэ үөрэнии, төрөөбүт ийэ тыл кэрэтин ыччакка иҥэрэн, тыл бараммат баайбыт буоларын итэҕэтии, тылы харыстыыр, араҥаччылыыр, сайыннарар үлэ барыахтааҕын өйдөтүү буолла.
Бастаан сэрэбиэйдээн ханнык улуус хасыһынан тахсарын чопчулаатылар. Хамаанда иһиттэн ким бастакынан, ким бүтэһигинэн тыл этэрин хамаанда бэйэтэ быһаарда.
Бастакы түһүмэххэ бэйэлэрэ бэлэмнээбит этиилэрин, ыҥырыыларын оҥорон элбэх сүбэ-соргу иһилиннэ, олоҕу толкуйдатар да түгэннэр бааллара. Иккис түһүмэххэ улуустар эрдэ бэлэмнээбит тиэмэлэрин ханнык түбэспитинэн ырыттылар, онтон үһүскэ икки бастыҥ хамаанда өс хоһоону хайдах өйдүүллэрин холобурдаатылар. Күрэс түмүгүнэн Үөһээ Бүлүү бастакы хамаандата бастаата, иккиһи Сунтаар, үһүс үрдэли Үөһээ Бүлүү иккис хамаандата ыллылар. Хас биирдии кыттааччыга туоһу сурук, кыайыылаахтарга уу харчынан туттардылар.
“Аман Өс” күрэс мэлдьи төрөөбүт тылбытын таптыыр дьону түмэ, күүстэригэр күүс, санааларыгар санаа эбэ үүнэн-сайдан истин!
Суруйда Л.А.Попов аатынан Сунтаардааҕы киин бибилэтиэкэ ааҕар саалатын сүрүннүүр бибилтиэкэрэ Саргылана Генерова
