От ыйын 20 күнүгэр кэрэ айылҕалаах Кэмпэндээйи сиригэр Леонид Попов аатынан киин библиотека көҕүлээһининэн биир дойдулаахпыт, Дьокуускай куоракка “Сыдьаайа” айар киин салайааччыта Анастасия Габышева –Сыдьаайа олохтоохторго маастар-кылаас ыытта. Тэрээһиҥҥэ Кэмпэндээйи сэлиэнньэтин далбар хотуттара — “Алаадьы” уонна “Туус Кэнэли” үҥкүү түмсүүтүн кыттыылаахтара сырыттылар.
Сыдьаайа кыра эрдэҕиттэн кэтээн көрөн олоҕор туһанар тутулуттан үллэһиннэ. Ол курдук “Кырбый уйата” турбаза кэрэ сиригэр кэлбит дьон күнтэн иитиллии, мастан күүс ылыы, тыыныы, ситимҥэ холбонуу хамсаныылары оҥорон айылҕа сорҕото, куйаар тутула буолууну кытта билистилэр. Маны таһынан сарсыарда “Турук үҥкүүтэ” анал таҥыллыбыт хамсаныылары оҥорон саҥа күнү сырдык туруктаах көрүстүлэр. Маастар кылаас кыттыылаахтара элбэҕи билэн, ис туруктара сааһыланарыгар үтүө сүбэлэри ылан аны да инникитин бу курдук тэрээһиннэр элбииллэригэр, тиһигин быспакка ыытылларыгар баҕа санааларын тиэртилэр уонна тэрийээччилэргэ, ыытааччыга махтал тылларын анаатылар.
Кэмпэндээйи модельнай библиотеката-музейа “Кэскил” кыраайы үөрэтэр түмэлгэ олус интэриэһинэй экскурсиялары олохтоон күннэтэ үгүс туристар, нэһилиэк ыалдьыттарын сэҥээриилэрин ылыан ылар. Ол курдук маастар кылаас ыыппыт ыалдьыппыт Сыдьаайа уонна Санкт-Петербург куораттан кэлэ сылдьар Моника Афанасьева олус астынан, Кэмпэндээйи историятыттан үгүс элбэҕи билэн, истэн Татьяна Ивановна Местниковаҕа махталларын тиэртилэр.
Изабелла Жиркова, Сунтаар улууһун бибилэтиэкэлэрин ситимин салайааччыта
