Бэс ыйын 20 күнүгэр Сунтаар уйгулаах ыһыаҕар ССРС суруйааччыларын Сойууһун чилиэнэ, РСФСР култууратын үтүөлээх үлэһитэ, Саха АССР искусстволарын үтүөлээх диэйэтэлэ, Үлэ Кыһыл Знамя уордьан икки төгүллээх туһааннааҕа, Сунтаар улууһун Бочуоттаах олохтооҕо, норуот ырыаһыта Кыыл Уола Сергей Афанасьевич Зверев төрөөбүтэ 125 сылыгар аналлаах “Айхал эйиэхэ, аар тайҕа” олоҥхо-тойугу дьиэ кэргэнинэн ааҕабыт” улуустааҕы уус-уран ааҕыы көрүү-күрэһэ үрдүк таһымҥа ыытылынна.
СӨ Олоҥхо Ассоциациятын Сунтаардааҕы салаата, Сунтаар улууһун култууратын уонна айылгытын салалтата, Сунтаар улууһун үөрэҕириитин салалтата, Сунтаардааҕы кииннэммит бибилэтиэкэ ситимэ, С. А. Сибиэрэп-Кыыл Уола аатынан улуустааҕы норуот айымньытын киинэ күрэһи С.А.Зверев-Кыыл Уола аатын, айымньытын үйэтитэр, дьиэ кэргэнинэн кинигэни, олоҥхо – саха норуотун героическай эпоһын ааҕыытын көҕүлүүр, бастыҥ олоҥхону ааҕар дьиэ кэргэни киэҥ эйгэҕэ билиһиннэрэр сыалтан тэрийдилэр. Быйыл Сунтаар улууһун дьиэ кэргэттэрэ“Айхал эйиэхэ, аар тайҕа” олоҥхону ааҕан, төрөөбүт тылбыт бараммат баайын, сүмэтин иҥэриннилэр, дьиэ кэргэҥҥэ сахалыы саҥарар эйгэни, саха тылын баайын, сүмэтин табатык туттарга, өйдүүргэ үөрэннилэр.
Улуус үрдүнэн бастакы түһүмэххэ барыта 16 нэһилиэктэн 48 ыал (402 киһи) кыттыыны ылла. Иккис түһүмэххэ дьүүллүүр сүбэ быһаарыытынан 11 ыал (124 киһи) талыллыбыта. Түмүктүүр түһүмэххэ улуус үрдүнэн 7 ыал (43 киһи): Сунтаартан Васильевтар, Бордоҥтон Петровтар, Бүлүүчээнтэн Максимовтар, Элгээйиттэн Кириллиннар, Тойбохойтон Уаровтар, Кутанаттан Ивановтар, Уустуйаттан Тарасовтар талыллан күөн көрүстүлэр. Дьүүллүүр сүбэҕэ Мария Васильевна Кондратьева, Сунтаардааҕы политехническай лиссиэй үрдүк категориялаах саха тылын уонна литературатын учуутала, РФ үөрэхтээһинин бочуоттаах үлэһитэ, СӨ үөрэҕириитин туйгуна, “Идэҕэ бэриниилээх буолуу” уонна “Учууталлар учууталлара” бэлиэлэр туһааннааҕа, Афанасьева Зинаида Михайловна, СӨ үөрэҕириитин бочуоттаах үлэһитэ, СӨ үөрэҕириитин туйгуна, “Учууталлар учууталлара” бэлиэ туһааннааҕа, үөрэх систематын бэтэрээнэ, үрдүк категориялаах саха тылын уонна литературатын учуутала, Спиридонова Саргылана Федотовна, Сунтаардааҕы кииннэммит бибилэтиэкэ методическай-информационнай салаа сэбиэдиссэйэ, СӨ култууратын туйгуна үлэлээтилэр.
Дьүүллүүр сүбэ быһаарыытынан 1 үрдэл Кириллиннар 25 тыһ. солк, 2-с үрдэл Васильевтар 15 тыһ.солк., 3-с үрдэл Петровтар 10 тыһ.солк. наҕаарадаланнылар. Дьиктитэ диэн бастыҥ ыаллары сүдү киһибит бэйэтэ талбытын курдук буолла. Ол курдук, Кириллиннар бүтүн аҕа ууһунан хомуллан барыта 15 киһи буолан кытыннылар. 2-с үрдэли ылбыт Васильевтарга эһэлэрэ биллэр алгысчыт, оһуохайдьыт, Саха АССР култууратын үтүөлээх үлэһитэ, Гражданскай килбиэн туһааннааҕа, Сунтаар улууһун Бочуоттаах олохтооҕо Иван Федорович Васильев, онтон 3-с үрдэли ылбыт Петровтарга аҕалара, СӨ норуотун маастара, өрөспүүбүлүкэҕэ биллэр тимир уус Кирилл Петров буолбуттара күрэс суолтатын үрдэттэ.
«Хомоҕой тыллаах дьиэ кэргэн» анал ааты Ивановтарга, «Сэһэннээх олоҥхону ааҕар дьиэ кэргэн» Максимовтарга, «Тэтимнээх ааҕааччы дьиэ кэргэн» Уаровтарга, «Көрөөччү биһирэбилэ» Тарасовтарга иҥэрилиннилэр, бары 3 тыһ.солк. биһирэннилэр.
Мустубут дьон астыммыттарын, дуоһуйбуттарын бэлиэтээтилэр. Олоҥхо-тойугу аахпыт дьиэ кэргэттэрбит норуот үгэстэрин, сиэрин-туомун тутуһарга, саха тылын сүмэтин иҥэрэргэ, сиэри-майгыны тутуһар холобурдарбыт буолалларын бэлиэтиибит. Кыттааччыларга барҕа махталбытын тириэрдэбит, үрүҥ тунах ыһыахтарынан итиитик-истиҥник эҕэрдэлиибит.
Саргылана Спиридонова, Алена Портнягина,
методическай-информационнай салаа үлэһиттэрэ
