Балаҕан ыйын 18 күнүгэр, Л.А.Попов аатынан киин бибилэтиэкэҕэ айар куттаах биир дойдулаахпыт СӨ норуотун маастара, эбэҥки бэйиэтэ Антонина Христофорова-Хагдаанайы кытта көрсүһүү буолан ааста. Кылгастык кини туһунан кэпсиир буоллахха 1956 сыллаахха Сунтаарга төрөөбүтэ. Ол курдук ийэтин төрүттэрин утумнаан эбэҥкилии иискэ, уус-уран оҥоһуктарга утумнаахтык дьарыктанан араас көрүүлэргэ, быыстапкаларга ситиһиилэхтик кыттар. Туоһунан оҥоһуктарга уонна эбэҥки таҥаһын тигиигэ хас даҕаны үөрэтэр босуобуйа ааптара. 2015 сыллаахха Москваҕа ыытыллыбыт Аан дойду таһымнаах быыстапкаҕа Гран При, ону таһынан култуура эйгэтигэр ситиһиилэрин иһин Эбэҥкилэр ассоциацияларын «Анҥани бэйэҥки-2015» (Человек года) анал ааттарын ылбыта. Уонна эбэҥкилэр ассоциацияларын сиэрин-туомун дьарыктанар анал бөлөҕүн үлэтигэр уо.д.а. тэрээһиннэргэ көхтөөхтүк кыттар. Төрүттэрин эбэҥкилэр тылларын утумнаахтык үөрэтэр. Бу күн Антонина Христофорова-Хагдаанай бэйэтин олоҕун, айар үлэтин, кинигэлэрин билиһиннэрдэ уонна хоһооннорун ааҕан иһитиннэрдэ, бэйэтэ тигэттээбит эбэҥки таҥастарын, киэргэллэрин, оҥоһуктарын сиһилии кэпсээн билиһиннэрдэ. Тэрээһиҥҥэ айар-суруйар дьоҕурдаах «Ньургуһун» литературнай түмсүү уонна «Иккис тыын» сыахай оҥорооччулар кыттыыны ыллылар.
Түмүккэ тэрээһин кыттыылаахтара ыйытыыларга хоруй ылан, элбэҕи биллилэр уонна хоту дойду таҥаһын кэтэн хаартыскаҕа хатанан үөрэн-көтөн тарҕастылар.
Суруйда Л.А.Попов аатынан киин бибилэтиэкэ ааҕааччыны кытта үлэлиир салаа сүрүннүүр бибилэтиэкэрэ Саргылана Генерова
