Тохсунньу 24 күнүгэр, С.А. Зверев-Кыыл Уола аатынан норуот айымньытын киинигэр сылын ахсын ыытыллар «Дойдубар дьоммор ситиһии көтөллөнөн» ааспыт 2022 сыл бастыҥнарын чиэстиир үөрүүлээх тэрээһиҥҥэ Сунтаарбыт улууһун «Ньургуһун» литературнай түмсүү тэриллибитэ 50 сылын чэрчитинэн автограф-сессия тэрилиннэ.
Кыттыыны ыллылар Елена Антонова-Күн Сиккиэрэ, Зинаида Федотова-Дьол Кыыма уонна Александр Амбросьев-Сайылык Уола. Бу күн олохтоох суруйааччыларбыт кинигэлэрин атыылаатылар, маны сэргэ «Ньургуһун» түмсүү актыыбынай чилиэнэ Зинаида Федотова-Дьол Кыыма Саха сирин Суруйааччыларын сойууһун чилиэнигэр киирбитинэн үөрүүлээх быһыыга-майгыга эҕэрдэ суругунан, өйдөбүнньүк сувенирынан наҕараадаланна, Кириэстээх нэһилиэгин «Тымтык» литературнай түмсүүтүн айар талааннааҕа Александр Амбросьев- Сайылык Уола «Золотое перо Руси» бүтүн Арассыыйатааҕы национальнай литературнай бириэмийэ «Моя малая Родина» анал аакка «Материнская любовь» айымньытынан бастыҥ ааттанна.
Суруйда түмсүү куратора Мария Алексеева
