Быйыл 2023 сыл-Арассыыйаҕа Учуутал уонна Аҕа сүбэһит сыла биллэриллибитэ. Хас биирдии киһи олоҕор, дьылҕатыгар учуутал оруола олус улахан суолталаах.
Бэс ыйын 15 күнүгэр Л. А. Попов аатынан Сунтаардааҕы киин бибилэтиэкэҕэ СӨ үөрэҕириитин туйгуна, нуучча тылын уонна литературатын учуутала Августина Николаевна Попова — Кыыдаана «Мгновения нашей жизни. Олох бараммат умсулҕана» диэн маҥнайгы кинигэтэ сүрэхтэннэ.
Ааҕааччыны кытта үлэлиир салаа кылаабынай бибилэтиэкэрэ Саргылана Генерова саҥа кинигэ ис тутулун билиһиннэрдэ.
Салҕыы ааптар бэйэтин олоҕун, аан бастакы айымньыта хайдах суруллубутун туһунан бэрт кылгастык кэпсээн ааста. Үтүө күн түһүлгэтигэр Сунтаардааҕы лицей -интернат учууталлара, бииргэ үөрэммит үөлээннээхтэрэ, аймах-билэ дьонноро кыттыыны ыллылар. Педагогическай үлэ бэтэрээнэ Валентина Сидорова, СӨ үтүөлээх учуутала Инна Иванова саҥа кинигэ туһунан санааларын үллэһиннилэр. Маны таһынан эҕэрдэлэрин, үтүө тылларын
Сунтаар улууһун култууратын уонна айылгытын салалтатыттан исписэлиис Анна Трифонова, Сунтаар улууһун бибилэтиэкэлэрин ситимин салайааччыта Изабелла Жиркова, улуустааҕы «Ньургуһун» литературнай түмсүү салайааччыта Розалия Сидорова — Ымычаана, Зинаида Федотова — Дьол Кыыма, кинигэ тахсыытыгар олук уурбут, айар-суруйар дьоҕурдаах дьоҥҥо күүс -көмө буолбут күндү киһибит Тускулаана Горохова-Кобельянова уонна бииргэ үөрэммит доҕотторо тириэртилэр.
Августина-Кыыдаана ыҥырыылаах ыалдьыттарга «Айар куттаах Кыыдаана» диэн тургутуктары, интэриэһинэй оонньуулары бэлэмнээн ыалдьыттары сэргэхситтэ, кыайыылаахтарга уонна кыттааччыларга сэмэй бэлэхтэринэн күндүлээтэ. Кинигэ сүрэхтэниитэ Анна Герман репертуарыттан «Надежда» диэн ырыаны бары бииргэ ыллаан түмүктээтилэр.
