Балаҕан ыйын 21 күнэ — Сунтаар улууһа төрүттэммит күнэ. Бу күн Л.А.Попов аатынан Сунтаардааҕы киин бибилэтиэкэ үгэскэ кубулуйбут «Ааһан иһэн ааҕан аас» диэн аахсыйатын тэрийэн ыытта. Быйылгы аахсыйа үбүлүөйдээх суруйааччыларбытыгар — Саха сирин норуодунай суруйааччыта, Cаха Өрөспүүбүлүкэтин суруйааччыларын Сойууһун уонна суруйааччылар норуоттар икки ардыларынааҕы сообществоларын, Россия суруналыыстарын Сойууһун чилиэнэ Наталья Михалева — Сайа 60 сааһынан уонна суруйааччы, эколог, спортсмен, С.А.Зверев-Кыыл Уолун холбоһуктаах түмэлин төрүттээччи, «Ньургуһун» литературнай түмсүүнү салайбыт Эдуард Соколов — Тулусхан төрөөбүтэ 80 сылын чэрчитинэн ыытылынна. Н. Михалева «Уйгур», Э. Соколов «Дьол» диэн кэпсээннэрин быһа тардан барыта 38 ааҕааччы ааһан иһэн аахтылар. Ол курдук, Куокуну, Күүкэй, Сунтаар, Дьаархан, Кутана, Маар Күөл нэһилиэктэрин олохтоохторо көхтөөх кыттыыны ыллылар уонна өйдөбүнньүк бэлэх ылан үөрдүлэр-көттүлэр.
Ааҕааччыны кытта үлэлиир салаа
