«Дьиэ кэргэн», «Оҕо саас», «Аҕам саастаахтарга ытыктабыл» сылларын түмүктүүр, 2025 сыл Арассыыйаҕа Аҕа дойдуну, Саха сиригэр Ийэ дойдуну көмүскээччилэр, Сунтаарбыт улууһугар С.А.Зверев — Кыыл Уолун сылларын үөрүүлээх аһыллыытын үтүө түһүлгэтигэр Л.А. Попов аатынан киин бибилэтиэкэ «Ааһан иһэн ааҕан аас” аахсыйаны ыытта.
Бүгүҥҥү аахсыйаҕа Уйбаан Александров “Саллаат аҕата” диэн СВО-ҕа баран инники кирбиигэ сылдьар Валерий Николаевич Попов СВО Запорожье хайысхатыгар буола турар балаһыанньаны сэһэргиир сэһэниттэн аахтылар.
Бу аахсыйаҕа барыта 18 ааҕааччы көхтөөх кыттыыны ылла. Ол иһигэр Сиэйэ — Романов А.Н., Күндэйэ — Константинов И.В., Арыылаах — Игнатьев И.Н. нэһилиэктэрин баһылыктара, Сунтаар нэһилиэгин баһылыгын солбуйааччыта — Николаев С.А. аахтылар.
Үгэскэ кубулуйбут аахсыйаҕа дьон-сэргэ үөрэнэн, сылын ахсын кыттааччы элбээн иһэрэ биһигини үөрдэр.
Маны таһынан, Улуу Кыайыы 80 сылыгар, үйэлэргэ сүгүрүйэр киһибит С.А.Зверев — Кыыл Уола төрөөбүтэ 125 сылыгар, үбүлүөйдээх суруйааччыларбыт Саргылана Спиридонова — Кэрэмэс Кийиитигэр, Александра Григорьева — Сандаарыйаҕа, Николай Түгүнүүрэпкэ, Николай Егоров — Аҕырытта Ньукулайга, Николай Чуорга, Иван Николаев — Уххаҥҥа аналлаах кинигэлэр быыстапкалара дьон — сэргэ сэҥээриитигэр турда.
Суруйда Мария Алексеева,
ааҕааччыны кытта үлэлиир салаа кылаабынай бибилэтиэкэрэ
