Л.А.Попов аатынан Сунтаар улууһун киин бибилэтиэкэтэ “Ааҕар Сунтаар” бырайыак чэрчитинэн Дьиэ кэргэн күнүгэр аналлаах“Ааҕыы абылаҥа” сахалыы баай бибилэтиэкэлээх дьиэ кэргэн улуустааҕы күрэһин ыытта.
Күрэс сыала-соруга: дьиэ кэргэҥҥэ ааҕыы суолтатын үрдэтии, сахалыы кинигэлэри ааҕыыга көҕүлээһин, дьиэ кэргэнинэн ааҕыы үтүө үгэстэригэр иитии-үөрэтии, ааҕар дьиэ кэргэттэри дьон сэҥээриитигэр таһаарыы. Барыта Элгээйиттэн, Аллыҥаттан, Кэппэндээйиттэн, Тойбохойтон, Кутанаттан, Сунтаар нэһилиэггиттэн 16 ыал кыттыыны ылла. Кыттааччылар күрэскэ ыыппыт видеороликтарыгар дьиэ кэргэннэрин, дьиэтээҕи бибилэтиэкэлэрин устуоруйатын сырдаттылар, сөбүлээн аахпыт кинигэлэрин туһунан санааларын үллэһиннилэр, ааҕааччы киэҥ араҥатыгар сүбэлээтилэр уонна сэдэх кинигэлэри билиһиннэрдилэр.
Дьүүллүүр сүбэ быһаарыытынан:
Андреевтар (Элгээйи), Михайловтар (Тойбохой), Ивановтар (Сунтаар) дьиэ кэргэттэрэ биһирэбил бириистэринэн наҕараадаланнылар. Иванова Зинаида Яковлевна дьиэ кэргэнэ (Сунтаар) “Матери России” Сунтаардааҕы салаатын анал бирииһинэн бэлиэтэннэ.
Кыайыылаахтарынан: I үрдэл – Саввиновтар (Аллыҥа), Герасимовтар (Кэппэндээйи), II үрдэл – Коркиннар (Элгээйи), III үрдэл — Кириллиннар (Элгээйи), Кылаан кыайыылааҕынан Кириллина Зоя Григорьевна (Кутана) дьиэ киэргэттэрэ буоллулар. Наҕараадалары информационнай-матодическай салаа сэбиэдиссэйэ Томская Мария Ивановна, “Матери России” Сунтаардааҕы салаатын бэрэссэдээтэлин солбуйааччы Максимова Евдокия Андреевна “Партизан” НАК Арассыыйатааҕы бибилэтиэкэлэр күннэрин чэрчитинэн ыытыллыбыт тэрээһиҥҥэ туттардылар. Бары кыттааччыларга туоһу сурук бэрилиннэ. Өссө төгүл кыайыылаахтары, кыттыбыт дьиэ кэргэттэри итиитик-истиҥник эҕэрдэлиибит, баҕарабыт бары үтүөнү, сырдыгы, кэрэни!
Алена Портнягина , Сунтаардааҕы кииннэммит библиотека ситимин методическай-информационнай салаа сүрүннүүр методиһа
