Сунтаар улууһугар 2023 сыл төрөөбүт төрүт тыл сылынан биллэриллибитэ. Сыл устата Л. А. Попов аатынан Сунтаардааҕы киин бибилэтиэкэ ааҕааччыны кытта үлэлиир салаатын үлэһиттэрэ «Ааҕар Сунтаар» бырайыагынан үлэлээтибит. Бырайыак чэрчитинэн сэтинньи ыйга – Байанай ыйыгар суруйар дьоҕурдаах, айар талааннаах дьону өйүүр сыалтан «Кутаа кэпсээннэрэ» аахсыйаны ыыппыппыт. Бастакытын ыытыллар аахсыйаҕа, киһи үөрүөх, элбэх үлэ киирбитэ. Ол курдук, Сунтаар, Уһун Күөл, Түбэй, Кутана, Күүкэй, Куокуну, Элгээйи, Кириэстээх нэһилиэктэриттэн, ону сэргэ Дьокуускай куораттан көхтөөх кыттыыны ылбыттара.
Бүгүҥҥү үөрүүлээх күммүтүгэр «Ньургуһун” литературнай түмсүү чилиэттэрэ Зинаида Федотова – Дьол Кыыма, Зинаида Васильева– Сыралы, Любовь Понохова– Тумара, Уһун Күөлтэн Эдуард Еремеев, Элгээйиттэн Иван Александров, Кириэстээхтэн Алексей Ксенофонтов олоҕун аргыһа Саргылана Алексеевна, Сунтаар бастакы нүөмэрдээх оскуолатын 8 кылааһын үөрэнээччитэ Саян Кокарев, куйаар ситимин нөҥүө Дьокуускай куораттан Николай Петров, Күүкэй нэһилиэгиттэн саха тылын учуутала Ангелина Петровна уонна кини үөрэнээччилэрэ Владик Григорьев, Гаврил Прокопьев кыттыыны ыллылар.
Саҥа кинигэ сүрэхтэниитигэр Сунтаар улууһун аҕа баһылыгын социальнай уонна имиджевай политикаҕа солбуйааччыта Гаврил Еремеев, Сунтаар улууһун култууратын уонна айылгытын салалтатын исписэлииһэ Дмитрий Петров, Сунтаар улууһун айылҕатын харыстабылын салайааччыта Сергей Макарович уонна Сунтаар улууһун «Булчут” тэрилтэ салайааччыта Максим Афанасьев эҕэрдэ тылларын эттилэр. Бу икки бииргэ үлэлэһэр тэрилтэбит сөбүлээбит айымньыларын ааптардарыгар бэйэлэрин анал бириистэрин туттардылар. Ол курдук айылҕа харыстабылын салайааччыта Сергей Николаев “Кусчуттар”, “Улахан булт” кэпээннэр ааптарыгар Иван Александровка Саха Өрөспүүбүлүкэтин Кыһыл Кинигэтин бэлэх уунна. “Булчут” тэрилтэ салайааччыта Максим Афанасьев анал бирииһин Күүкэй оскуолатын 11 кылааһын үөрэнээччитэ Владик Григорьев “Айылҕа иччитэ” айымньытынан ылла.
Бу кинигэҕэ киирбит айымньылар ааптардара ааҕааччыны кытта үлэлиир салаа үлэһиттэригэр махтал тылларын тириэртилэр, аймньылаах үлэни баҕара хааллылар. Түмүккэ Л.А.Попов аатынан Сунтаардааҕы киин бибилэтиэкэ салайааччыта Изабелла Жиркова кэлбит ыалдьыттарга махтал суруктары уонна “Кутаа кэпсээннэрэ” кинигэни бэлэх уунна.
Саҥа кинигэ эр дьоҥҥо аналлаах булт абылаҥнаах араас түгэннэринэн, мүччүргэннээх сырыыларынан, дьиҥ олоххо буолан ааспыт түбэлтэлэр кэпсэнэллэринэн киһи болҕомтотун тардар. Бу хомуурунньук аахсыйа кыттыылаахтарын айымньыларын наардаан, сааһылаан ааҕааччы киэҥ араҥатыгар тарҕатар сыаллаах. Дьон-сэргэ сэҥээриитин ылыа диэн эрэнэбит.
Түмүккэ тэрээһин кыттыылаахтара маннык үлэлэр ыытыллалларын сэргээтилэр уонна бэйэлэрин этииилэрин киллэрдилэр : Уһун Күөлтэн Эдуард Еремеев Арассыыйа Дьоруойа Дмитрий Егоров дьиэ кэргэнин туһунан матырыйаал элбэх, онон кинигэ тахсарыгар үлэлэһиэҕиҥ диэтэ. Элгээйиттэн Иван Александров сылгыһыттар тустарынан киинэ уонна кэпсээннэрдээх кинигэ тахсарыгар бэйэтин баҕа санаатын эттэ.
Л.А. Попов аатынан Сунтаардааҕы киин бибилэтиэкэ ааҕааччыны кытта үлэлиир салаата
