Сунтаар улууһун үөрэҕириитэ өрөспүүбүлүкэҕэ биллэр-көстөр, үтүө үгэстэрдээх, үгүс ситиһиилэрдээх, бастыҥ бачыымнардаах. Маны сүрүннээччинэн, көҕүлээччинэн, биллэн турар, оскуола слайааччылара буолаллар. Оскуоланы салайыы куйаар кэриэтэ киэҥ, сатабылы, болҕомтону, эрэли эрэйэр. Дириэктэр салайар дьоҕуруттан хас биирдии оҕо эргиччи сайдыыта тутулуктаах.
Бүгүҥҥү үтүө күн түһүлгэтигэр саҥа кинигэ биһирэмэ буолла. “Аан дойду аартыга-оскуола» кинигэни РФ үөрэҕириитин бочуоттаах үлэһитэ, СӨ үөрэҕириитин үтүөлээх үлэһитэ, Сунтаар улууһун үөрэҕириитин бочуоттаах үлэһитэ, Сунтаар нэһилиэгин бочуоттаах олохтооҕо, Сунтаардааҕы гуманитарнай гимназия дириэктэрэ Любовь Егоровна Евсеева, СӨ үөрэҕириитин туйгуна, РФ үөрэхтээһинин Бочуоттаах үлэһитэ Мария Афанасьевна Бекренева уонна СӨ үөрэҕириитин үлэһитэ Капитон Николаевич Никифоров хомуйан оҥордулар.
Саҥа кинигэ Дьокуускай куоракка “Офсет” издательствоҕа 200 ахсаанынан, 358 сирэйдээх бэчээттэнэн таҕыста. Ис тутула 8 түһүмэхтэн турар. Кинигэҕэ Сунтаар улууһун үүнэр көлүөнэтин, кэнэҕэски ыччатын иитэн , үөрэтэн олох суолугар үктэннэрбит туспа суоллаах-иистээх, педагогическай үлэҕэ өр кэмҥэ буспут-хаппыт, улуус, өрөспүүбүлүкэ таһымыгар биллибит-көстүбүт оскуола дириэктэрдэрин 1970-с сыллартан 2025 сылга диэри үлэлэрэ сырдатылынна. Дириэктэрдэр ахтыылара, кинилэр айымньылаах үлэлэрин туоһулуур элбэх хаартыскалар киирдилэр. Кинигэ иитии-үөрэтии эппиэттээх эйгэтигэр үлэлиир дьоҥҥо, ордук саҥа салайааччыларга, инники солбукка олус туһалаах буолуоҕа.
Үтүө күн түһүлгэтигэр Сунтаарбыт улууһун аҕа баһылыга Анатолий Васильевич Григорьев, 1990-с сылларга үлэлии сылдьыбыт оскуола дириэктэрдэрэ, билигин үлэлии-хамсыы сылдьар дириэктэрдэр Ассоциациялара, Новосибирскай куораттан РСФСР норуотун үөрэҕириитин туйгуна, РФ үөрэҕириитин систиэмэтин бочуоттаах үлэһитэ, Саха Сирин үөрэҕириитин үтүөлээх үлэһитэ, Саха Өрөспүүбүлүкэтин үөрэҕириитин туйгуна, Саха Өрөспүүбүлүкэтин учууталларын учууталлара Абрамович Валентина Федотовна, Дьокуускайтан 2000-2006 сылларга Сунтаар коррекционнай оскуолатын дириэктэрэ, Дьокуускай куорат территориальнай быыбардыыр хамыыһыйа бэрэссэдээтэлэ Алексеева Сардана Борисовна, Мэҥэ Хаҥаластан Россия уопсай үөрэхтээһинин бочуоттаах үлэһитэ, Физическай культураҕа уонна спортка туйгуна, Кириэстээх политехническэй оскуолатын 2017-2023 сылларга дириэктэрэ, Кириэстээх нэһилиэгин бочуоттаах олохтооҕо Васильев Павел Васильевич эҕэрдэлэрин тириэртилэр. Билии киэҥ аартыгын арыйар, сырдыкка-кэрэҕэ үөрэтэр баай уопуттаах, үтүө сүбэһит салайааччылары, дириэктэрдэри сырдатар “Аан дойду аартыга-оскуола” кинигэ ааҕааччы киэҥ сэҥээриитин ылыа диэн эрэнэбит.
Суруйда Мария Алексеева
